29 чэрвеня экс-кандыдат у прэзыдэнты Ўладзімер Някляеў прапанаваў усім апазыцыйным прэтэндэнтам на прэзыдэнцкую пасаду зьняцца з выбараў да пачатку рэгістрацыі ініцыятыўных групаў і падтрымаць вылучэньне палітвязьня і былога кандыдата ў прэзыдэнты Міколы Статкевіча адзіным кандыдатам ад дэмсілаў.
Сяргей Калякін
Старшыня Беларускай партыі левых «Справядлівы сьвет» Сяргей Калякін назваў ініцыятыву Някляева «пустой прапановай, у якой няма ніякага сэнсу: Някляеў прапаноўвае адмовіцца ад удзелу ў выбарах і пакінуць поле бою свабодным, бо ўзамен нічога ня будзе».
«Зразумела на 300%, што ініцыятыўная група Статкевіча зарэгістраваная ня будзе, — адзначыў Калякін. — У гэтым выпадку мы проста пакідаем Лукашэнку разам з Гайдукевічам у абсалютна камфортных умовах і падстаўляем усю апазыцыю: маўляў, яна ні на што ня здольная і сама пайшла з поля бою, прызнаўшы сваю паразу. Іншая справа, калі б ён прапанаваў, каб нашы людзі, зьбіраючы подпісы ў сваю падтрымку, паралельна зьбіралі подпісы за вызваленьне Статкевіча. Гэта значыць — выкарыстаць выбарчую кампанію для вызваленьня палітзьняволеных. Гэта была б мне зразумелая пазыцыя, і мы былі б гатовыя ў ёй удзельнічаць».
Павал Канавальчык
Кіраўнік выбарчага штабу беспрацоўнага Юрыя Шульгана, якога падтрымлівае партыя «Зялёныя», Павал Канавальчык паведаміў БелаПАН, што іх каманда, абмеркаваўшы ініцыятыву Някляева, вырашыла яе не падтрымліваць. «Мы ня будзем здымацца з выбараў, мы будзем ісьці да канца — рэгістраваць ініцыятыўную групу і, адпаведна, весьці кампанію паводле свайго сцэнару, — заявіў Канавальчык. — Справа ў тым, што першапачаткова гэтая ініцыятыва мела хутчэй сымбалічны, а не практычны характар. Статкевіч, як чалавек, які яшчэ не адбыў пакараньне, згодна з законам ня можа быць зарэгістраваны кандыдатам у прэзыдэнты. Гэтая ідэя ніякім чынам ня можа быць увасобленая ў юрыдычную форму, таму гэтую ініцыятыву мы не падтрымліваем».
Тацяна Караткевіч
Ініцыятыву Някляева не падтрымлівае і Тацяна Караткевіч, якая мае намер балятавацца на пасаду прэзыдэнта ад кааліцыі «Народны рэфэрэндум». На прэсавай канфэрэнцыі 30 чэрвеня Караткевіч заявіла, што для яе двухгадовая праца каманды і ўдзел у выбарах зьяўляецца «пытаньнем маралі — быць адказнай і пасьлядоўнай у палітыцы». Адначасова Караткевіч выказала гатоўнасьць аказваць падтрымку Статкевічу.
Старшыня Аб’яднанай грамадзянскай партыі Анатоль Лябедзька заявіў БелаПАН, што пакуль ня вызначыўся наконт прапановы Някляева.
Уладзімер Някляеў
Уладзімер Някляеў, камэнтуючы стаўленьне да яго ініцыятывы прэтэндэнтаў на пасаду прэзыдэнта, адзначыў: «Нельга сказаць, што я зусім гэтага не чакаў. Але ў мяне была надзея на тое, што адказнасьць за нешта большае, чым інтарэсы партый як асобных структураў, прымусіць іх прыслухацца да маёй прапановы».
Паводле палітыка, яго ініцыятыва — «гэта ня толькі салідарнасьць са Статкевічам, які цяпер у турме, але яшчэ і салідарнасьць зь людзьмі, народам, які ў нейкім сэнсе таксама знаходзіцца ў турме».
«Трэба было б прыдумаць альтэрнатыву плошчы, і гэтай альтэрнатывай лягічна вынікае палітвязень Мікола Статкевіч, вылучэньне яго як адзінага кандыдата, патрабаваньне вызваленьня палітвязьня і патрабаваньне свабодных выбараў, — сказаў Уладзімер Някляеў у інтэрвію Свабодзе. — На гэтай альтэрнатыве магла б аб’яднацца ўся дэмакратычная беларуская грамадзкасьць, якой на сёньня ня так ужо і мала, значна больш, чым пра гэта распавядаюць сродкі афіцыйнай прапаганды. Але гэта ня выйшла, таму што, як заўсёды, асабістыя інтарэсы, групавыя інтарэсы, інтарэсы партыяў пераважаюць над нацыянальнымі, над дзяржаўнымі інтарэсамі».