Дзень вышыванкі адбыўся у Русінах, пад Баранавічамі, на сядзібе Таварыства беларускай мовы. У ім прынялі ўдзел каля сотні чалавек. У часе фэсту «Баранавіцкая вышыванка» прысутныя паслухалі выступы аб гісторыі вышыўкі, сымбалях, была арганізаваная выстава ручнікоў. Паглядзелі фільмы пра вышыванку, старыя фотаздымкі беларусаў у нацыянальных строях.
Кіраўнік баранавіцкай філіі ТБМ, арганізатар фэсту Віктар Сырыца:
«Упершыню ў Баранавічах мы ладзім такое сьвята. Сабраліся, каб апрануць кашулі вышываныя, паказаць ручнікі, паслухаць гісторыю вышыванкі».
Многія з прысутных, нават маленькія дзеткі былі адзетыя ў вышыванкі, кашулі з нацыянальным арнамэнтам. Баранавіцкі ўкраінец Рыгор Грык прыйшоў у кашулі, якую шмат гадоў таму пашыла яго маці.
Выступіў адзін з старэйшых сябраў баранавіцкай арганізацыі Таварыства беларускай мовы Чэслаў Сухарэбскі. Спадар распавёў, што беларуская культура цяпер перажывае не найлепшыя часы і заклікаў актыўней «паказваць сваю адметнасьць, паказваць сваю беларускасьць».
Баранавіцкі прадпрымальнік Мікола Чарнавус пачаставаў удзельнікаў фэсту гарбатай ды аладкамі, прыгатаванымі на вогнішчы каля сядзібы.