Дзяржаўная служба па надзвычайных сытуацыях Украіны паведаміла аб ліквідацыі буйнога ляснога пажару ў зоне адчужэньня аварыйнай Чарнобыльскай АЭС.
У ведамстве адзначылі, што радыяцыйны фон на месцы пажару знаходзіцца ў межах нормы.
Полымя ўспыхнула 28 красавіка. Агонь распаўсюдзіўся на плошчы ў 320 гектараў. Надзвычайнае здарэньне выклікала засьцярогі аб магчымым павышэньні ўзроўню радыяцыі ва Ўкраіне і ў Беларусі.
На барацьбу з агнём былі кінутыя больш як 300 пажарных, задзейнічаныя тры самалёты, гелікоптэр.
26 красавіка споўнілася 29 гадоў зь дня Чарнобыльскай трагедыі, калі выбух на 4-м рэактары АЭС прывёў да радыеактыўнага забруджваньня шырокіх тэрыторый Беларусі, Украіны і Расеі. Аварыя стала найбуйнейшай катастрофай у гісторыі цывільнай ядзернай энергетыкі.
Да гэтага часу працягваюцца працы над узьвядзеньнем бясьпечнага саркафага над аварыйным чацьвёртым блёкам станцыі. Гэтыя працы плянуецца завяршыць да 2017 году.
Экстранныя службы заяўляюць, што радыяцыйны фон у межах нормы.