Героі Лявона Вольскага Саўка ды Грышка абмяркоўваюць шэсьце 25 сакавіка. Грышка заклікае адзначыць сьвята «пад роднай Пагоняй», а Саўка ўпіраецца: «Гэта сьвята фашыстаў».
Грышка:
Дзень Волі — усё ўрачыста,
Узьнёсла, сьвяточна і чыста.
Хадзем з намі, Саўка, у шэраг!
Пакрочым па плошчах і сквэрах.
Саўка:
Ай, знаеш, Рыгор, адчапісь ты!
Сказалі мне сьпецыялісты,
Што с празьнікам што-та нячыста -
Яго атмячаюць фашысты!
Грышка:
Савелій, але ж — ну і шыз ты!
Якія такія фашысты?!
Мы проста пакрочым калонай
Пад нашаю роднай Пагоняй.
Саўка:
Вы знаеце, з нас ужэ хваціт
Пагонь эціх вашых і свасьцік!
Нам нада рэкордных удояў
Пад нашай савецкай зьвяздою.
Нам нада аванс і зарплата,
Кабзон, КВН, мірны атам...
І штоб посьле сьмены па трыста.
А хто не сагласен — фашысты!
Грышка:
Ой, Саўка, які ты чырвоны!
Пакуль, я пакрочу з калонай.
Сустрэнемся, дружа, пазьней мы,
Як пройдзе тваё абвастрэньне.