Авіяцыя ЗША і саюзьнікаў нанесла першыя ўдары па пазыцыях групоўкі «Ісламская дзяржава» на тэрыторыі Сырыі.
Пра гэта паведаміў прадстаўнік Міністэрства абароны ЗША віцэ-адмірал Джон Кірбі. Паводле яго слоў, у рэйдах прынялі ўдзел зьнішчальнікі і бамбавікі, выкарыстаны ракеты «Тамагаўк».
Кірбі не паведаміў, якія менавіта саюзьнікі ЗША прынялі ўдзел у паветранай апэрацыі, але агенцтва Associated Press паведаміла са спасылкай на крыніцу ў Пэнтагоне, што гаворка ідзе пра арабскія дзяржавы. Паводле дадзеных CNN, гэта Бахрэйн і Катар.
Нанясеньне удараў па аб’ектах на сірыйскай тэрыторыі зьяўляецца часткай абвешчанай прэзыдэнтам ЗША Баракам Абамам кампаніі барацьбы з групоўкай «Ісламская дзяржава». Гэтая групоўка вядзе баявыя дзеяньні на тэрыторыях Сырыі і Ірака.
Да гэтага часу ваенна-паветраныя сілы ЗША нанесьлі па пазыцыях «Ісламскай дзяржавы» амаль дзьвесьце ўдараў, але ўсе гэтыя атакі ажыцьцяўляліся выключна на тэрыторыі Ірака.