Былы міністар унутраных спраў Украіны, цяпер апазыцыйны палітык Юры Луцэнка быў вывезены ў шпіталь пасьля ўдару па галаве, атрыманага ў сутычцы з байцамі спэцаадзелу міліцыі «Беркут» каля будынку Сьвятошынскага раённага суду ў Кіеве
Мясцовыя тэлеканалы паказалі Луцэнку з акрываўленым тварам.
Пацярпелі таксама два дэпутаты Вярхоўнай Рады — Эдуард Лявонаў і Юры Бублік. Двум журналістам разьбілі фотатэхніку.
Пратэстоўцы, у асноўным актывісты правай партыі «Свабода», сабраліся каля суду ў чаканьні прысуду ў справе так званых «васількоўскіх тэрарыстаў» — трох жыхароў гораду Васількоў у Кіеўскай вобласьці, якія абвінавачваліся ў падрыхтоўцы падрыву помніка Леніну ў Барыспалі ў 2011 годзе.
Your browser doesn’t support HTML5
Байцоў «Беркуту» вымусілі зьняць маскі
Паводле вэрсіі сьледзтва, ім не ўдалося ажыцьцявіць задуманае, паколькі мясцовыя ўлады дэмантавалі манумэнт самі.
Калі вечарам у пятніцу суд абвясьціў прысуд — па шэсьць гадоў пазбаўленьня волі кожнаму — дэманстранты пачалі кідаць у «беркутаўцаў» рознымі прадметамі, разгойдваць іх аўтобусы і пырскаць фарбай на лабавыя шыбы.
Пасьля сьнежаньскіх сутыкненняў на Майдане «Беркут» стаў вельмі непапулярны сярод апазыцыянэраў, якія лічаць яго прыладай рэжыму Януковіча.
Міліцыя ў адказ дзейнічала жорстка.
«Байцы „Беркута“ білі ўсіх запар, у тым ліку жанчын і старых. Перасьледвалі мінакоў і зьбівалі тых, хто ужо ляжаў на зямлі», — распавёў журналістам дэпутат Лявонаў. У яго самога засталіся гематомы на нагах, вопратка парваная і ўся ў брудзе.
