У цэнтры сталіцы Нарвэгіі Осла адбыўся моцны выбух. Некалькі чалавек параненыя.Паведамляецца пра сямёх забітых.
Выбуховай хваляй выбітыя шыбы ў 17-павярховым будынку ўраду, у тым ліку і ў офісе прэм'ер-міністра. Сам Енс Столтэнберг не пацярпеў.
Побач з рэзыдэнцыяй прэм'ер-міністра знаходзіцца будынак рэдакцыі галоўнага таблоіда "Вэрдэнс Ганг", зь яго таксама эвакуяваныя людзі.
У пацярпелым раёне сканцэнтраваныя міністэрствы і іншыя ўрадавыя ўстановы, але цяпер у Нарвэгіі сэзон адпачынкаў, і многія офісы былі напаўпустымі.
Паводле некаторых дадзеных, пацярпела каля 8 чалавек, ёсьць забітыя. Прычына выбуху пакуль невядомая. У паліцыі не выключаюць, што закладзена яшчэ некалькі выбуховых прыстасаваньняў, якія пакуль ня знойдзеныя.
Таксама сёньня ў маладзёвым летніку Утоя, непадалёку ад Осла, чалавек, апрануты ў паліцэйскую унформу распачаў страляніну. Мясцовая прэса паведамляе пра некалькі забітых. У паліцыі пакуль зьвесткі аб забітых у летніку не пацьвярджаюць, але заяўляюць, што гэты інцыдэнт і выбух у сталіцы - хутчэй за ўсё зьвязаныя паміж сабой.
Дагэтуль СМІ паведамлялі, што ў Нарвэгіі няма тэрарыстычных арганізацыяў.
