Аляксандр Лукашэнка запатрабаваў дабіцца пагашэньня «Газпромам» доўгу за транзыт, паведаміў тэлеканал АНТ. Патрабаваньне прагучала на сустрэчы зь першым віцэ-прэм’ерам Уладзімерам Сямашкам.
Раней паведамлялася, што «адным з галоўных прадметаў абмеркаваньня» на сустрэчы Лукашэнкі і Сямашкі былі пэрспэктывы разьвіцьця Беларускай калійнай кампаніі.
Беларускі бок патрабуе ад «Газпрома» выплаты 217 млн. даляраў за транзыт расійскага газу, пасьля чаго да 5 ліпеня гатовы пагасіць доўг за атрыманы газ (ад 187 да 192 млн. даляраў). Акрамя таго, Менск абяцае да 23 чэрвеня поўнасьцю аплаціць майскія пастаўкі.
Раніцай 21 чэрвеня «Газпром» на 15% скараціў падачу газу ў Беларусь і можа працягнуць памяншэньне паставак, калі Менск не пагасіць доўг, паведамляе БелаПАН.