У Менску адбылося першамайскае шэсьце актывістаў ВКПБ і незарэгістраванай філіі расейскіх нацыянал-бальшавікоў (НБП, якую узначальвае Эдуард Лімонаў, у Расеі забароненая законам за экстрэмізм). Акцыя была дазволеная менскімі ўладамі.
Калёна прайшла па маршруце Акадэмія Навук, праспэкт Незалежнасьці, вуліца Сурганава, парк Бангалёр, дзе адбыўся мітынг. Усяго ў шэсьці і мітынгу бралі удзел каля 50 актывістаў. Беларускія нацболы несьлі расьцяжку "Рабочы вазьмі сваё" і выкрыквалі лёзунгі "Капіталізм – дзярмо", "Буржуеў -- на нары, рабочых на Канары" ды іншыя. Бальшавікі сталага веку несьлі партрэты Ленана і Сталіна, чырвоныя сьцягі і расьцяжку "Толькі дыктатура пралетарыяту прывядзе да перамогі сацыялізму".
Міліцыянты прымусілі лімонаўцаў зьняць нарукаўныя павязкі з партыйнай эмблемай (чорныя серп і молат ў белым крузе на чырвоным сьцягу). Пра затрыманьні падчас акцыі невядома.
Відэа: Шэсьце нацболаў і сталіністаў-ленінцаў у Менску
Your browser doesn’t support HTML5
Шэсьце нацболаў і камуністаў у Менску
