Расея можа прад'явіць афіцыйнаму Менску рэгрэсіўны пазоў у зьвязку зь няпоўнай аплатай газу ў першым квартале.
Пра гэта Інтэрфаксу заявіў дарадца па эканамічных пытаньнях амбасады Расеі ў Беларусі Андрэй Кузьняцоў.
Ён патлумачыў, што расейскі бок можа падаць пазоў у выпадку, калі органы фінкантролю Расеі прад'явяць “Газпрому” прэтэнзіі адносна выручкі за газ, пастаўлены ў Беларусь у I квартале.
Дыплямат нагадаў, што ў адпаведнасьці з вуснай дамовай кіраўнікоў дзьвюх краінаў, Беларусь у I квартале 2009 году аплочвала газ з разьліку сярэднегадавой цаны — каля 150 даляраў за тысячу кубамэтраў замест кантрактнай цаны ў 210 даляраў. Аднак юрыдычна гэтыя дамоўленасьці не былі аформленыя.
Андрэй Кузьняцоў нагадаў, што “Газпром”, каб кампэнсаваць перавышэньне фактычнай цаны I квартала параўнальна зь сярэднегадавой, авансам заплаціў 250 мільёнаў даляраў за транзыт газу па тэрыторыі Беларусі. Гэтых сродкаў было дастаткова, каб пакрыць перавышэньне цаны ў I і II кварталах адносна сярэднегадавой.
“Суб'екты гаспадараньня павінны разабрацца з гэтай сытуацыяй. Тут няма ніякай палітыкі, але ёсьць пытаньне павагі да заканадаўства адной і другой краіны”, — сказаў спадар Кузьняцоў.