Бел-чырвона-белыя сьцягі зьявіліся сёньня ў Лідзе, Наваградку і Горадні.
Пра чарговыя акцыі легендарнага Мірона распавёў Радыё Свабода ягоны зямляк, віцебскі апазыцыянэр Барыс Хамайда.
Спадар Хамайда кажа, што пра акцыі яму паведамілі вартыя даверу крыніцы.
У прыватнасьці, яму стала вядома, што сёньня ўраньні бел-чырвона-белы сьцяг лунаў над вуліцай Адама Міцкевіча ў Лідзе. Ён быў вывешаны на электрычных дратах паміж жылымі дамамі № 24 і 26.
Да сьцяга, паводле Барыса Хамайды, была прымацаваная цыдулка такога зьместу: “Мае віншаваньні са сьвятам грамадзянам гораду з прыгожай назвай Ліда! Асабістае прывітаньне рэдактару газэты “Наша слова” Станіславу Судніку, які змагаецца за нашу цудоўную беларускую мову. Жыве Беларусь! Жыве вечна! Мірон”.
Каля паўдня яшчэ адзін бел-чырвона-белы сьцяг зьявіўся ў Наваградку на вуліцы Гарадзенскай. Ён таксама быў прымацаваны да электрычных дратоў і лунаў на самым уезьдзе ў Наваградак з боку Гародні.
Барыс Хамайда кажа, што да сьцяга была прымацаваная цыдулка з калядным віншаваньнем: “Са сталіцы Вялікага Княства Літоўскага, слаўнага гораду Наваградка віншую ўсіх ліцьвінаў-беларусаў з Калядамі. Наступны 2009 год будзе годам нашых чарговых перамог. Толькі наперад! Мірон”.
Каля 19-й вечара нацыянальны сьцяг зьявіўся і ў Горадні – над пешаходным мостам па вуліцы Гарнавых, недалёка ад гістарычнага цэнтру гораду. Вартыя даверу крыніцы паведамілі Барысу Хамайду, што ў цыдулцы, прымацаванай да сьцяга, напісана:
“Нарэшце я ў цудоўнай Горадні зь яе храмамі і старажытнай гісторыяй. Мае шчырыя віншаваньні са сьвятам грамадзянам Горадні! Давайце разам захаваем гістарычную забудову гораду! Жыве Беларусь! Жыве вечна! Мірон”.