Невядомы зрабіў ілжывае паведамленьне пра замінаваньне Маладзечанскага палітэхнічнага каледжу, дзе знаходзіцца Партызанскі выбарчы ўчастак нумар 8.
Як паведаміла агенцыя “Інтэрфакс-Захад”, увечары ў панядзелак на Маладзечанскую станцыю хуткай дапамогі патэлефанаваў невядомы і паведаміў, што замінаваны будынак каледжу. Сапёры выехалі на месца, але ніякіх выбуховых прыстасаваньняў не знайшлі. Яшчэ раней сапёры выяжджалі на тэлефанаваньне адносна пакету, які знайшлі на Цэнтральнай плошчы і які падаўся падазроным, аднак ў ім знаходзіўся абутак. Па факце ананімнага тэлефанаваньня заведзеная крымінальная справа паводле артыкулу 340 Крымінальнага кодэксу “Наўмысна ілжывае паведамленьне пра небясьпеку”.