У прамове падчас урачыстай імшы ў Менскай катэдры 1 лістапада каталіцкі мітрапаліт Тадэвуш Кандрусевіч назваў бальшавіцкую рэвалюцыю 1917 году «экзістэнцыяльнай катастрофай», перадае «Белсат».
Паводле Тадэвуша Кандрусевіча, расейская Кастрычніцкая рэвалюцыя «прынесла нечуваныя пакуты беларускаму народу», але афіцыйна ў Беларусі яе гадавіна адзначаецца як сьвята. Ён заклікаў маліцца ня толькі за сваіх продкаў, але і за тых, хто забыты, хто не пасьпеў нарадзіць дзяцей, загінуў у Курапатах, Трасцянцы, савецкіх і нацысцкіх канцлягерах. За дзень да імшы Кандрусевіч наведаў Курапаты і маліўся ў месцы, дзе НКВД расстрэльвала беларускае мірнае насельніцтва.
Таксама Кандрусевіч заклікаў падпісваць пэтыцыю за тое, каб зрабіць выходнымі днямі 1 і 2 лістапада, бо 1-га каталікі адзначаюць Дзень усіх сьвятых, а 2-га – Дзяды, традыцыйны беларускі дзень памінаньня продкаў .
Адпаведны памятны дзень у праваслаўных – Радаўніца – у Беларусі зроблены выходным днём. Але каталіцкія памінальныя дні застаюцца звычайнымі працоўнымі, хоць афіцыйна лічацца дзяржавай рэлігійным сьвятам нароўні з праваслаўнай Радаўніцай, а каталікоў у Беларусі каля 1,4 млн. Аўтары пэтыцыі лічаць гэта дыскрымінацыяй.
На момант публікацыі пэтыцыю падпісалі паўтысячы чалавек. Зварот зьбіраюцца накіраваць у Савет Міністраў і Адміністрацыю прэзыдэнта 7 сьнежня.
