Лінкі ўнівэрсальнага доступу

Суд над удзельнікамі акцыі «недармаедаў» у Менску. Архіўнае фота, 17 сакавіка
Суд над удзельнікамі акцыі «недармаедаў» у Менску. Архіўнае фота, 17 сакавіка

Суды, затрыманьні, зьбіцьцё. Дзень 12. Жывы блог

У Беларусі другі тыдзень ідуць масавыя суды над удзельнікамі «Маршаў недармаедаў», ужо затрыманыя ці асуджаныя больш за 250 «недармаедаў». За ўчора-пазаўчора да 17 чалавек былі затрыманыя пасьля заявы Лукашэнкі пра «лягеры баевікоў».

У Чачэрску затрыманы да суду Арцём Кавалёў. ​Ён дастаўлены ў Чачэрскі РАУС. Пра гэта паведамляе на сваёй старонцы ў фэйсбуку праваабаронца Леанід Судаленка. Малады чалавек зь бел-чырвона-белым сьцягам быў у жывым эфіры Свабоды з «Маршу недармаедаў» у Гомлі 19 лютага. ​

Вітаўт Сіўчык, сын затрыманага сёньня актывіста Вячаслава Сіўчыка, паведаміў на сваёй старонцы ў фэйсбуку што бацьку «знайшлі» ў Цэнтры ізаляцыі правапарушальнікаў на вуліцы Акрэсьціна ў Менску, але пра яго стан нічога невядома. Лідэр руху «Разам» Вячаслаў Сіўчык затрыманы падчас жалобнай цырымоніі на пахаваньні свайго дзядзькі, яго забралі ў аўтобусе, які ехаў на могілкі ў Навінкі пад Менскам.

Актывіст Павал Юхневіч знаходзіцца ў Цэнтры ізаляцыі правапарушальнікаў на Акрэсьціна. Суд над ім мае адбыцца заўтра.

Паўла Юхневіча затрымалі каля 19.00 23 сакавіка. Пра сваё затрыманьне ён сам паведаміў у фэйсбуку.

Натальлю Папкову будуць судзіць 24 сакавіка за «Марш недармаедаў» у Берасьці

Ленінскі суд Берасьця перанёс разгляд справы Натальлі Папковай на 24 сакавіка, бо яна заявіла хадайніцтва аб неабходнасьці заключэньня дамовы з адвакатам.

Натальля Папкова, архіўнае фота
Натальля Папкова, архіўнае фота

Адну зь лідэраў берасьцейскіх пратэстаў Натальлю Папкову затрымалі 22 сакавіка на вакзале ў Берасьці, калі яна мелася зьяжджаць у Менск для ўдзелу ў акцыі 25 сакавіка. Натальлю зьвінавацілі ва ўдзеле ў несанкцыянаванай масавай акцыі — «Маршы недармаедаў», які адбыўся 5 сакавіка ў Берасьці.

Судовае паседжаньне пачалося сёньня ўвечары, аднак яго давялося перанесьці, бо актывістка заявіла хадайніцтва, што ёй трэба час, каб заключыць дамову з адвакатам.

Разгляд справы Натальлі Папковай адбудзецца 24 сакавіка ў 11.30 у Ленінскім судзе Берасьця. Да суду яе вызвалілі з-пад варты.

Як сказаў Свабодзе берасьцейскі праваабаронца Ўладзімер Вялічкін, ён ня мае сумневу, што Натальлі прысудзяць суткі:

«Канстытуцыя гарантуе яе права на ўдзел у мірных сходах, яна і ўдзельнічала. Яна мае права выказваць свае думкі. За што ж тут караць? Гэта ўсё робіцца менавіта для таго, каб запалохаць насельніцтва, каб пра сваю бяду не гаварылі ўголас».

Актывістка «Маладой Беларусі» Натальля Папкова — адна зь лідэраў пратэстаў «недармаедаў» у Берасьці.

3 сакавіка, перад трэцім «Маршам недармаедаў» у Берасьці (прызначаным на 5 сакавіка), яе затрымалі і зьмясьцілі ў псыхіятрычную лякарню, быццам бы пасьля скаргі суседзяў, што яна хоча скончыць жыцьцё самагубствам.

Пасьля вызваленьня ў інтэрвію Свабодзе Натальля сказала, што думак пра самагубства ў яе не ўзьнікала.

Іван Кавальчук — новы затрыманы

Брат Івана Аляксей Кавальчук паведаміў Свабодзе, што Івана затрымалі на падыходзе да інтэрната БНТУ каля станцыі мэтро «Пятроўшчына». У інтэрнацкім пакоі зрабілі ператрус «людзі ў цывільным». Знайшлі чырвона-чорны сьцяг, берцы, каску, літаратуру пра зброю. Іван Кавальчук мае як хобі дыгерства, удзельнічае ў рыцарскім клюбе.

Маладэчна. Затрыманы Павал Сяргей (актывіст «Пошуга»), ягоны брат Валеры Сяргей і жонка брата Кацярына Сяргей.

Павал Сяргей хаваўся ад перасьледу ў братавай кватэры. У сцэнары затрыманьня былі выкарыстаны аўтамабілі МНС, людзі ў цывільным і міліцыянты.

Пратакол адносна Аляксандра Процкі суд у Гомелі накіраваў на дапрацоўку, яго вінавацілі ў распаўсюдзе ўлётак да 25 сакавіка.

Журналіста-фрылансэра Яўгена Меркіса судзьдзя Віталь Каўбеня пакараў штрафам у 30 базавых (690 рублёў).

Яго абвінавацілі ў працы без акрэдытацыі і ў незаконным вырабе прадукцыі СМІ для замежнага тэлеканалу «Белсат».

Меркіс адмовіўся даваць тлумачэньні, бо даваў іх у міліцыі. Судзьдзя не дапусьціў да удзелу ў працэсе прадстаўніка Меркіса Леаніда Судаленку.

Яўген Меркіс падчас працы, архіўнае фота
Яўген Меркіс падчас працы, архіўнае фота

Павал Юхневіч паведаміў у фэйсбуку пра сваё затрыманьне.

Павал Юхневіч з дачкой на Дні Волі — 2015
Павал Юхневіч з дачкой на Дні Волі — 2015

Бабруйск. Затрыманага раней Уладзімера Лазарава выпусьцілі. Галіну Сьмірнову выпусьцілі з ізалятара з рэчамі да суду 24 сакавіка. Але потым яе прывезьлі на размову ў пракуратуру і туды ж выклікалі праваабаронцу Алега Жалнова.

Бабруйск. З затрыманымі на ганку Бабруйскага суду актывістамі ў пракуратуры правялі індывідуальную размову, папярэдзіўшы кожнага аб тым, што вядома, што яны займаюцца падрыхтоўкай мітынгу 26 сакавіка. Размаўляў з кожным асабіста намесьнік пракурора. Затрыманы з сабакам журналіст Віктар Качан пайшоў скардзіцца на затрыманьні журналістаў — і іх адпусьцілі без размоваў.

Пра перанос суду над Галінай Сьмірновай сказаў актывістам толькі падпалкоўнік Рудзько. Але ў ізалятары перадачу для яе не прымаюць, кажуць «пачакайце, пакуль нічога невядома».

Суд Маладэчанскага раёну прызнаў рэдактарку сайту Kraj.by Сьвятлану Цішко вінаватай у парушэньні парадку арганізацыі масавых мерапрыемстваў. Журналістку пакаралі штрафам у 20 базавых велічыняў(460 рублёў) за артыкул пра акцыю «недармаедаў», якім яна нібыта заклікала людзей да ўдзелу ў несанкцыянаванай акцыі.

Лагвінца павезьлі ў лякарню

У судзе Маскоўскага раёну пачалі разглядаць адміністрацыйную справу, пачатую супраць Алеся Лагвінца па артыкуле 17.1 (дробнае хуліганства).

У суд выклікалі хуткую для Алеся Лагвінца і абвясьцілі перапынак. Пазьней стала вядома, што яго павезьлі ў 9-ю лякарню.

Паводле актывісткі Аліны Нагорнай, Лагвінца білі пры затрыманьні.

Алеся Лагвінца затрымалі з 22-гадовым сынам Антосем, калі яны выходзілі з кватэры на вуліцы Касманаўтаў.

Паводле непацьверджанай інфармацыі, затрыманы Ўладзь Яроменак.

Алу Раманчык судзьдзя Віталь Каўбеня аштрафаваў на 15 базавых (345 рублёў)

Бабруйск. Суд над Галінай Сьмірновай перанесьлі на 25 сакавіка. Да наступнага судовага паседжаньня яе будуць трымаць у СІЗА. Журналістаў і актывістаў, затрыманых у дворыку суду ў Бабруйску, адпусьцілі, апроч Уладзімера Лазарава — яго павезьлі ў ГУУС. Таісію Кабанчук дагэтуль трымаюць на допыце.

Натальлю Шчыліну судзьдзя Аляксандар Мохараў пакараў штрафам у 10 базавых (230 рублёў) за ўдзел у акцыі пратэсту ў Рагачове.

Затрыманы намесьнік старшыні АГП Мікалай Казлоў

Пра гэта паведаміў актывіст Аб’яднанай грамадзянскай партыі Дзяніс Красачка.

«Я ехаў у офіс паразмаўляць зь Мікалаем. Мэтро да Маскоўскай было перакрыта. Вырашыў патэлефанаваць, што спазьняюся. Мікалай кажа, што яго затрымалі», — сказаў Дзяніс Красачка.

Падрабязнасьці затрыманьня высьвятляюцца. Тэлефон Казлова ўжо недаступны.

Мікалай Казлоў прадстаўляе АГП у аргкамітэце сьвяткаваньня Дня Волі.

Мікалай Казлоў
Мікалай Казлоў

Савецкі суд Гомля арыштаваў Анатоля Паплаўнага на 5 сутак за ўдзел у акцыі пратэсту ў Рагачове. Паплаўнага прывезьлі з ізалятару, дз ён адбывае 10 сутак арышту за ўдзел у "маршы недармаедаў" у Гомелі.

Максіма Філіповіча арыштавалі яшчэ на пяць сутак

Савецкі суд Гомля арыштаваў блогера Максіма Філіповіча яшчэ на пяць сутак.

Яго абвінавацілі ва ўдзеле ў мірнай акцыі пратэсту ў Берасьці.

Максім Філіповіч ужо адбывае 14-суткавы арышт за ўдзел у акцыі пратэсту супраць «дармаедзкага» дэкрэту № 3 у Пінску.

Справу блогера разглядаў судзьдзя Аляксандар Мохараў. У залі прысутнічалі жонка і маці Філіповіча.

Судзьдзя зачытаў пратакол, на што Філіповіч адказаў: «Гэта страшная мана і паклёп. Ніякіх лёзунгаў я не выкрыкваў і ў галаве калёны не ішоў. Я здымаў тое, што адбывалася на вуліцах Берасьця».

Таксама Філіповіч сказаў, што спыніў галадоўку 18 сакавіка.

Загрузіць яшчэ

XS
SM
MD
LG