На станцыю «Пралетарская» мэтро Санкт-Пецярбургу, што ў Расеі, грамадзянін Беларусі 11 кастрычніка спрабаваў пранесьці гранату часоў Другой усясьветнай вайны, перадае «Фонтанка».
42-гадовы мужчына ў час пік прайшоў праз рамку мэталадэтэктара (паводле іншых СМІ, паставіў вялікую торбу ў рэнген-апарат), прыбор спрацаваў, паліцыянты спынілі мужчыну для агляду. Калі ў ягонай торбе знайшлі гранату, мужчыну накіравалі ў паліцыю, а гранату — на экспэртызу. Станцыю ў гэты час эвакуявалі, яна не працавала больш за гадзіну.
Далейшы лёс беларуса не ўдакладняецца, як і тое, зь якой мэтай ён правозіў гранату і як яе здабыў. У Расеі за незаконную перавозку боепрыпасаў могуць прысудзіць штраф, папраўчыя работы, абмежаваньне волі ці пазбаўленьне волі на тэрмін да чатырох гадоў.