24 лютага ў малой залі Белдзяржфілярмоніі адбылася вечарына «Песьні матчыны з Вушаччыны», прысьвечаная 80-годзьдзю народнага паэта Беларусі Рыгора Барадуліна.
Арганізатарам і вядоўцам вечарыны стаў саліст Белдзяржфілярмоніі, лідэр гурта Vuraj Сяржук Доўгушаў. Ён апавёў, што падчас адной з сустрэчаў Барадулін падарыў яму кнігу «Песьні матчыны з Вушаччыны», укладзеную з народных песьняў роднага рэгіёну.
Прэзэнтаваная падчас імпрэзы літаратурна-музычная кампазыцыя складзеная па гэтай кнізе Барадуліна. Удзельнікі гурта адзначылі, што сёньняшняе сьвята важнае для ўсіх, хто лічыць сябе беларусам, што Барадулін народны не паводле свайго статусу, а паводле сваёй сутнасьці.
На вечарыне выступілі паэт Сяргей Панізьнік і журналіст Глеб Лабадзенка, якія былі добра знаёмыя з паэтам.
Сяржук Доўгушаў таксама расказаў пра кнігу «Дзёньнікі Барадуліна», прэзэнтацыя якой адбудзецца 27 лютага ў менскім Палацы мастацтваў.
Заля была поўная аматараў творчасьці Барадуліна.
Гурт Vuraj плянуе запісаць на дыск кампазыцыю «Песьні матчыны з Ушаччыны».
