У анэксаваным Расеяй Крыме ўвялі рэжым надзвычайнай сытуацыі рэгіянальнага характару
У анэксаваных Крыме і Севастопалі ўвялі рэжым надзвычайнай сытуацыі рэгіянальнага характару. Пра гэта паведаміў прызначаны Расеяй «кіраўнік» анэксаванага Крыму Сяргей Аксёнаў.
Паводле яго слоў, рашэньне прынята для «ўпарадкаваньня фінансава-грашовых, крэдытных, дагаворных і іншых адносін», а таксама для спрашчэньня працэдур, зьвязаных з кампэнсацыяй стратаў.
Рэжым надзвычайнай сытуацыі ўвялі на фоне ўкраінскіх удараў па анэксаванай паўвысьпе, паведамляе тэлеканал «Настоящее время».
У апошнія дні ў Крыме і Севастопалі фіксаваліся перабоі з электразабесьпячэньнем, а з канца траўня працягваецца энэргетычны крызіс. Абмежаваны продаж паліва, улады прыпынілі прыём дзяцей у летнія лягеры да канца сэзону, але фармальна турыстычны сэзон не закрыты.
Раніцай 26 чэрвеня на ўездах на Крымскі мост утварыліся шматкілямэтровыя чэргі. Па дадзеных тэлеграм-канала «Крымскі мост: апэратыўная інфармацыя», з боку Тамані ў чаканьні надгляду знаходзіліся каля тысячы аўтамабіляў, з боку Керчы — амаль 1800.
Час чаканьня ў чарзе на ручны надгляд дасягаў трох-чатырох гадзінаў. Буйны затор узьнік пасьля таго, як ноччу рух па мосьце быў цалкам спынены амаль на шэсьць гадзін на фоне масіраванага нападу ўкраінскіх бесьпілётнікаў на анэксаваны Крым.
