Лінкі ўнівэрсальнага доступу

Атакі ў Крыме працягваюцца. Стужка апошніх сутак, фота, відэа

Кіраўнік НАТО заклікаў Расею вывесьці войскі. Пуцін пагадзіўся на «кантактную групу» па Ўкраіне.


Коратка

ЖЫВАЯ ТРАНСЬЛЯЦЫЯ
07:38 3.3.2014
Абама і Кэмэран папярэдзілі Маскву аб «значных стратах» з-за дзеяньняў у Крыме

У тэлефоннай размове прэзыдэнт ЗША Барак Абама і прэм’ер-міністар Вялікабрытаніі Дэвід Кэмэран назвалі непрымальнымі дзеяньні Расеі ў дачыненьні да Ўкраіны на тэрыторыі Крыму. Абама і Кэмэран папярэдзілі Маскву аб «значных стратах» ў выпадку, калі Расея ў бліжэйшыя гадзіны ня выведзе свае войскі з тэрыторыі Крыму.

«Яны пагадзіліся, што дзеяньні Расіі абсалютна непрымальныя. Яны таксама дамовіліся, што для дээскаляцыі канфлікту патрэбен непасрэдны дыялёг паміж Украінай і Расеяй », — піша прэс-сакратар Даўнінг-стрыт.
06:43 3.3.2014
Украінская пракуратура скасавала сэпаратысцкія рашэньні ў Крыме

Калегія Генэральнай пракуратуры Ўкраіны нагадала ў нядзелю вайскоўцам Узброеных сіл, што яны прысягалі на вернасьць ўкраінскаму народу, такім чынам выкананьне імі патрабаваньняў па здачы зброі, пакіданьне ваеннай тэхнікі і месцаў дыслякацыі будзе расцэньвацца як дзяржаўная здрада з адпаведнымі прававымі наступствамі.

У звароце таксама нагадваецца аб незаконнасьці шэрагу дзеяньняў і рашэньняў па захопу і спыненьні дзейнасьці канстытуцыйных органаў улады, а таксама спробы неправамерна падпарадкаваць падразьдзяленьні праваахоўных органаў Украіны мясцовай улады або стварэньне так званых мясцовых праваахоўных органаў. Генэральная пракуратура Ўкраіны, у прыватнасьці, ужо падала ў адміністрацыйны суд пазоў аб адмене шэрагу рашэньняў, прынятых 27 лютага Вярхоўнай Радай Крыму, у прыватнасьці, аб выказваньні недаверу Радзе міністраў Крыма, спыненьне яе дзейнасьці, прызначэньне Сяргея Аксёнава на пасаду кіраўніка крымскага ўрада, а таксама аб арганізацыі і правядзеньні рэспубліканскага (мясцовага) рэфэрэндуму па пытаньнях удасканаленьня статусу і паўнамоцтваў крымскай аўтаноміі.
06:19 3.3.2014
Расейцы захапілі зброю ва ўкраінскай частцы ў Бельбеку

Пры гэтым акупацыйныя войскі ў Крыме ўжывалі сьветлашумавые гранаты. Украінскія войскі выконваюць загад да стрыманасьці. Расейскія вайскоўцы, выкарыстоўваючы светлашумавыя гранаты, захапілі амаль усе будынкі ўкраінскай ваеннай часткі 4515 у Бельбеку. Пра гэта «Украінскай праўдзе» распавёў салдат роты аховы часткі 4515 Раман Берагавы:

«Расейцы прыехалі сюды тры дні таму. Спачатку яны занялі будынак, дзе заля абслугоўваньня дэлегацый, куды прыляталі Януковіч і іншыя. На наступны дзень занялі памяшканьне, дзе нашы самалёты стаялі, потым атачылі варту. Сёньня расейцы штурмавалі каравул, кідалі сьветлашумавые гранаты. Спачатку сказалі здаваць зброю. Караул адмовіўся. А вечарам сталі закідваць сьветлашумавыя гранаты. Мы не адказвалі, таму што загаду зьверху няма. Яны забралі зброю. У нас не было загаду ўступаць у бой. Мы не адказвалі на правакацыі. Здалі каравул, здалі склады. Па стане на гэты момант яны занялі амаль усю частку. Застаўся толькі адміністрацыйны будынак і сьцяг. Вось мы іх зараз ахоўваем. Занялі абарону», — сказаў ён.

Пры гэтым Берагавы падкрэсьліў, што камандзір часткі і ўся частка гатовыя змагацца.
06:02 3.3.2014
Намесьнік Генэральнага сакратара ААН едзе ва Ўкраіну

Генэральны сакратар ААН Пан Гі Мун накіраваў ва Ўкраіну свайго намесьніка Яна Эліясана па выніках кансультацый у Радзе бясьпекі і ў сувязі з разьвіцьцём становішча ва Ўкраіне, заявіла ў нядзелю ў Нью-Ёрку прэс-сакратар кіраўніка ААН. Паводле гэтага паведамленьня, Эліясан накіроўваецца ва Ўкраіну ўжо вечарам у нядзелю па амэрыканскім часе. Ва Украіне намесьнік генэральнага сакратара ААН асабіста ацэніць становішча на месцы і затым паведаміць генсакратару пра тое, якія далейшыя крокі можа зрабіць ААН для разрадкі сытуацыі, гаворыцца ў паведамленьні.
05:53 3.3.2014
Кітай падтрымаў цэласнасьць Украіны

Кітай паважае незалежнасьць, сувэрэнітэт і тэрытарыяльную цэласнасьць Украіны, заявіў у нядзелю ў Пэкіне прадстаўнік Міністэрства замежных спраў Кітая. Кітай «здаўна прытрымліваецца прынцыпу неўмяшаньня ва ўнутраныя справы», заявіў Цынь Ган, камэнтуючы журналістам сытуацыю ва Ўкраіне.

Кітай занепакоены гэтым становішчам і заклікае датычных да палітычнага вырашэньня рознагалосьсяў шляхам дыялёгу і перамоў на аснове захаваньня міжнароднага права і нормаў міжнародных адносін для забесьпячэньня міру і стабільнасьці ў рэгіёне, прывяло словы прадстаўніка МЗС кітайскае агенцтва «Сіньхуа». Па словах прадстаўніка МЗС КНР, Кітай працягвае ўважліва сачыць за разьвіцьцём падзей ва Ўкраіне.

У той жа час, як вынікае з паведамленьня, ён ня стаў і наўпрост вінаваціць Расею ў парушэньні міжнароднага права яе вайскоўцам уварваньнем ва Ўкраіну, як зрабіла шэраг іншых дзяржаў сьвету.
05:02 3.3.2014
«Вялікая сямёрка» адмовілася да саміту ў Сочы

Прадстаўнікі сямі вядучых індустрыяльных дзяржаваў сьвету – гэтак званай «Вялікай сямёркі» заявілі, што прыпыняюць ўдзел у плянаваным міжнародным саміце ў Расеі. Белы Дом выступіў з такой супольнай заявай ад імя лідэраў сямі краінаў, прэзыдэнта Эўрапейскай Рады і прэзыдэнта Эўрапейскай камісіі. У заяве гаворыцца, што дзеяньні Расеі ва Ўкраіне парушаюць прынцыпы і каштоўнасьці «Вялікай сямёркі» і «Вялікай васьмёркі».

У «Вялікую сямёрку» ўваходзяць Брытанія, ЗША, Італія, Канада, Нямеччына, Францыя і Японія. У «Вялікую васьмёрку» акрамя гэтых краінаў ўваходзіць Расея, якая мелася правесьці саміт «васьмёркі» ў Сочы ў чэрвені.
04:33 3.3.2014
Як паведамляе сайта KERCH.COM.UA, невядомыя ўзброеныя людзі спрабуюць пранікнуць на тэрыторыю Керчанскага атраду марской аховы.

Яны прыехалі на некалькіх мікрааўтобусах, у аднаго зь якіх расейскія нумары. Як паведаміў журналістам капітан III рангу Сяргей Шамшура, невядомыя людзі ў форме не вылучаюць ніякіх патрабаваньняў, марскія памежнікі знаходзяцца на сваіх пастах, зброя Керчанскага атраду марской аховы знаходзіцца пад кантролем ўкраінскіх вайскоўцаў, атрыбутыка марской часткі захаваная.
03:22 3.3.2014
02:24 3.3.2014
Дзярждэпартамэнт ЗША пацьвердзіў, што дзяржсакратар ЗША Джон Кэры наведае Кіеў у аўторак, каб выказаць падтрымку новаму часоваму кіраўніцтву краіны.
01:08 3.3.2014
Нямеччына: Пуцін пагадзіўся на «кантактную групу» па Ўкраіне.

Урад Нямеччыны паведаміў, што прэзыдэнт Расеі Ўладзімер Пуцін пагадзіўся на прапанову стварыць міжнародную «кантактную групу» ў пытаньні Ўкраіны.

Паводле ўрадавага паведамленьня, Пуцін пагадзіўся на прапанову канцлера Нямеччыны Ангелы Мэркель «неадкладна стварыць дасьледчую місію, а таксама кантактную групу, магчыма пад кіраўніцтвам АБСЭ, каб распачаць палітычны дыялёг».

У заяве гаворыцца, што Мэркель выказала такую ідэю ў тэлефоннай размове, падчас якой яна абвінаваціла Пуціна ў парушэньні міжнародных законаў шляхам «непрымальнай» расейскай інтэрвэнцыі ў Крыме.
00:43 3.3.2014
Кіраўнік НАТО заклікаў Расею вывесьці войскі

Генэральны сакратар НАТО Андэрс Фог Расмусэн заклікаў Расею вывесьці свае войскі з Украіны і ўстрымацца ад умяшаньня ў іншых частках гэтай краіны.

Раней у нядзелю Расмунсэн заявіў, што увод расейскіх войскаў у Крым «пагражае міру і бясьпецы ў Эўропе. Расея павінна спыніць свае вайсковыя дзеяньні».
00:06 3.3.2014
Украіна можа перакрыць мяжу з Расеяй

Першы віцэ-прем'ер Украіны Віталій Ярэма падчас ток-шоў "Шустэр Лайф" на "5-м канале" сказаў, што межы паміж Украінай і Расеяй могуць быць перакрыты і ўсталяваны жорсткі кантроль за перасячэньнем мяжы грамадзянамі Расеі.

Паводле Ярэмы, на прарасейскія мітынгі ва ўсходнія рэгіёны Украіны завозяць грамадзян Росеі. «На мітынгі прыцягваюцца асобы, прывезеныя з Расейскай Фэдэрацыі - гэты мы даказваем сёньня дакумэнтальна», - сказаў ён.
23:25 2.3.2014
Украінскі экспэрт: сям'ю адмірала выкралі

Кіраўнік украінскага цэнтру ваенна-палітычных дасьледаваньняў Дзьмітрый Цімчук напісаў на сваёй старонцы ў фэйсбуку, што контр-адмірал Дзяніс Беразоўскі прынёс прысягу на вернасьць «жыхарам аўтаномнай рэспублікі Крым і горада Севастопаля» пад прымусам, бо ягоную сям'ю выкралі.

Раней сёньня Беразоўскі быў вызвалены ад пасады камандуючага Ваенна-Марскіх Сіл Узброеных Сіл Украіны ўказам выканаўцы абавязкаў прэзыдэнта Ўкраіны Аляксандра Турчынава пасьля таго як у сеціве зьявілася відэа з такой прысягай. Намесьніца кіраўніка Рады нацыянальнай абароны Ўкраіны Вікторыя Сюмар паведаміла, што супраць Беразоўскага заведзеная крымінальная справа па факту здрады. Міністар абароны абавязкі камандуючага ВМС Украіны ўсклаў на контр-адмірала Сяргея Гайдука.

22:38 2.3.2014
У Крыме захапілі штабы памежнікаў

Вялікая колькасьць невядомых людзей і расейскіх вайскоўцаў штурмам узяла штабы Азова-Чарнаморскага рэгіянальнага ўпраўленьня і Сімферопальскага памежнага атрада.
Пра гэта паведамілі ў Дзяржаўнай памежнай службе Ўкраіны.
Паводле паведамленьняў, тыя, хто нападаў выламалі ўсе дзьверы, зьнішчылі аўтаматызаваныя працоўныя месцы і сродкі сувязі. Пакоі захоўваньня зброі былі зачыненыя і памежнікі не дапусьцілі захопу зброі.
22:17 2.3.2014
Чэхія выказала Расеі пратэст

Міністар замежных спраў Чэхіі Любамір Зааралэк выклікаў расейскага амбасадара Сяргея Кісялёва, каб паведаміць яму, што лічыць дзеяньні Расеі ў дачыненьні да Крыма і іншых рэгіёнаў Украіны «неадэкватнымі і агрэсіўнымі»:

«Ужываньне воінскіх падразьдзяленьняў супраць сувэрэннай суседняй дзяржавы, з чым пагадзілася верхняя палата парлямэнта Расейскай Фэдэрацыі, зьяўляецца абсалютна неапраўданым крокам, груба супярэчыць прынцыпам Арганізацыі па бясьпецы і супрацоўніцтве ў Эўропе, а таксама парушае Статут ААН і так званы Будапэшцкі мэмарандум 1994 года, у якім Расея, Злучаныя Штаты і Вялікабрытанія абавязаліся паважаць незалежнасьць і сувэрэнітэт Украіны », -- цытуе словы Любаміра Зааралэка амбасада Чэхіі ва Ўкраіне.
22:11 2.3.2014

Загрузіць яшчэ

Глядзець камэнтары (2)

Гэтая дыскусія закрытая.
XS
SM
MD
LG