Менск. Суд Маскоўскага раёну. Вольга Рошчына, грамадзянка РФ — арышт 13 сутак.
Гомель. У Савецкім раённым судзе штрафам у 18 базавых велічынь пакаралі Алу Раманчык.
У Кастрычніцкім судзе пачалі штрафаваць
Штраф у 30 базавых велічынь атрымаў Максім Кавалёў. Паводле пратаколу, яго затрымалі ў 13.50 ля Акадэміі навук, насамрэч у 15.40 каля пл. Якуба Коласа. Судзьдзя Сяргей адмовілася праглядаць відэа, на якім а 15.00 Максім зь сябрам быў у гандлёвым цэнтры «Імпульс».
Судзяць грамадзянку Расеі
Менск. Суд Маскоўскага раёну. Судзяць Вольгу Рошчыну. Судзьдзя Аляксандар Петраш. Яна грамадзянка Расеі, жыве ў Кашыры. На працэсе Вольга кажа, што ня бачыла пратаколу.
Абвясьцілі перапынак для азнаямленьня з пратаколам. Пасьля перапынку Вольга заявіла, што нязгодная з пратаколам. На яе складзеныя два пратаколы. Нібыта на Акадэмічнай удзельнічала ў несанкцыянаваным мерапрыемстве — арт. 23.34. Другі пратакол — нецэнзурна лаялася, арт.17.1 — хуліганства. Яна сьцьвярджае, што на першым пратаколе — не яе подпісы. Таксама адмаўляе, што нецэнзурна выказвалася, мітынгу не было — там былі толькі АМАП і журналісты.
Вольга скардзіцца, што не далі патэлефанаваць, не пускалі ў прыбіральню, не давалі вады цягам 10 гадзін — да прыводу ў камэру на Акрэсьціна. У справе ёсьць рапарт міліцыянта. Быццам бы сярод асабістых рэчаў быў пакет з расьцяжкай «Усіх не перасаджаеш». Вольга сьцьвярджае, што расьцяжка не яе, пакет «падкінулі». А нецэнзурна яна ніколі не выказваецца.
Арыштам пакаралі расейца, фігуранта «Балотнай справы»
Менск. У Ленінскім раённым судзе 12 сутак атрымаў расеец Аляксей Паліховіч, былы фігурант «Балотнай справы».
Судзяць фотакарэспандэнта
Менск. У Ленінскім раённым судзе таксама судзяць фотакарэспандэнта-фрылансэра Рамана Пратасевіча. Судзьдзя Тацяна Дарашчонак. Яму пагражае пакараньне па двух пратаколах, за 25 і 26 сакавіка.
Менск. Суд Маскоўскага раёну. Андрэй Лыньнік аштрафаваны на 30 базавых велічынь — 690 рублёў. Андрэй кажа, што штраф большы за месячны заробак, будзе абскарджваць.
Судзяць Паўла Белавуса
Менск. У Ленінскім раённым судзе судзяць Паўла Белавуса, дырэктара «Арт-сядзібы». Судpьдзя Дзьмітры Астапенка. Выступілі сьведкі міліцыянты Яфанаў і Мікуцэвіч, якія даказвалі, што Белавус нібыта ўдзельнічаў у недазволенай акцыі на Кастрычніцкай плошчы 26 сакавіка. Павал абвяргаў, казаў, што быў з жонкай, паставілі аўто на Кастрычніцкай плошчы і ішлі ва ўнівэрсам «Цэнтральны», як іх спынілі міліцыянты і затрымалі абодвух.
Жонку, Кацярыну Маковіч, якая цяжарная, празь 10 хвілінаў выпусьцілі з аўтазаку, яго затрымалі. Адвакат запрасіла ў суд праглядзець відэазапіс. Было бачна, што затрымлівалі іншыя, ня сьведкі. Перапынак. Пасьля абеду будуць праглядаць іншае відэа.
Гомель. У суд Чыгуначнага раёну прыйшлі сваякі затрыманых 25 сакавіка маладзёнаў Віктара Чумачэнкі і Зьмітра Каўтунова. Чакаюць, ніякай інфармацыі пра суды няма. Сюды ж маюць прывезьці Аляксандра Процку, Алу Раманчык, Натальлю Шчукіну.
Менск. Кастрычніцкі раённы суд. Судзяць Крысьціяна Шынкевіча. Судзьдзя Маргалік. Шынкевіча затрымалі на Нямізе, ішоў у офіс. Гэта было яшчэ да мітынгу.
Менск. Кастрычніцкі раённы суд. Грамадзяніну Ўкраіны Руслану Цярэшчанку — арышт 15 сутак. Судзьдзя Камушкін.
Цярэшчанку далі 5 сутак арышту за ўдзел у несанкцыянаваным мерапрыемстве і 10 сутак нібыта за брыдкаслоўе. Ён абвяргаў, што брыкасолвіў.
Новы судны дзень у Гомлі
27 сакавіка ў Гомлі пачынаюцца суды над удзельнікамі «Маршу недармаедаў-2» і мітынгу каля ДК таварыства глухіх на Дзень Волі. Меркавана, што адміністрацыйныя справы будуць разглядацца ў трох раённых судах — Чыгуначным, Савецкім, Гомельскім сельскім.
Пасьля акцыі пратэсту былі схопленыя і прэвэнтыўна адпраўленыя ў ізалятар Аляксандар Процка, Натальля Шчукіна, Ала Раманчык. Яшчэ да акцыі затрымалі і адвезьлі ў ізалятар намесьніка старшыні АГП Васіля Палякова.
У вёсцы Цярэшкавічы Гомельскага раёну затрымалі рэгіянальнага прадстаўніка Беларускага незалежнага прафсаюзу РЭП Віктара Казлова, а ў Гомелі — актывіста гэтага ж прафсаюзу Аляксандра Еўсейчука.
Чакаюцца суды і над некалькім моладзевымі актывістамі, затрыманымі падчас сьвяткаваньня Дня Волі.
Першы прысуд — 12 сутак
Менск. Кастрычніцкі раённы суд. Першы прысуд — 12 сутак арышту атрымаў Арцём Чарняк. Прасіў супакоіць бацькоў.
У Маскоўскім судзе Менску
Менск. Кастрычніцкі раённы суд. Падсудны Арцём Чарняк кажа: «У 13.50, як пазначана ў пратаколе, што я браў удзел у шэсьці, мяне ўжо трымалі ў аўтазаку. Мяне ўзялі ў 13.30, стаяў на ходніках, нічога не крычаў і сьцяга не трымаў. Да мяне падышлі амапаўцы і пацягнулі ў аўтазак. Як мяне забралі, ніякага шэсьця не было. Стаялі толькі журналісты і міліцыянты».
Чарняк нарадзіўся ў Маладэчна, мае сярэдне-спэцыяльную адукацыю, беспрацоўны.
Пачаўся судовы канвэер у Менску
Менск. У Кастрычніцкім раённым судзе судзяць Арцёма Чарняка. Судзьдзя Лагвіновіч. Людзей выводзяць з пакоя на 4 паверсе, дзе трымаюць усіх разам, вядуць да судзьдзі і адразу судзяць.
Чарняку інкрымінуюць удзел у недазволеным шэсьці ад Акадэміі навук да плошчы Коласа ў Менску і што выкрыкваў «Жыве Беларусь!»
Менск. У суд Цэнтральнага раёну прывезьлі каля 20 чалавек, сярод іх Дзьмітры Кавалгін, Дзяніс Садоўскі, Дзьмітры Сільчанка.
Менск. У Партызанскі раённы суд на другі паверх даставілі Паўла Белавуса, якога затрымалі ўчора ля Кастрычніцкай плошчы.
Менск. У Партызанскім раённым судзе будуць судзіць Паляховіча і Аляксандра Курца, судзьдзя Германовіч.
Вінярскі і Марцалеў абвясьцілі галадоўку
Менск. У Партызанскім раённым судзе пачынаецца працэс над Максімам Вінярскім. Вінярскі кажа, што зараз зь ім прывезьлі ў суд 14 чалавек, у тым ліку Сяргея Марцалева. Яны абодва абвясьцілі галадоўку.