Адна з намінацыяў — «прыз глядацкіх сымпатыяў», у якой пераможца будзе вызначаны па выніках онлайн-галасаваньня на сайце Tut.by. «Народны праект» атрымае 2000 рублёў і «дадатковую ўвагу мэцэнатаў».
У намінантах 16 праектаў, у ліку якіх праграма хуткай электроннай перапіскі са зьняволенымі, праект рэабілітацыі людзей з нэўралягічнымі захворваньнямі з выкарыстаньнем шлемаў віртуальнай рэальнасьці, супольнасьць валянтэраў-кампаньёнаў для пэнсіянэраў у падарожжах, школа карысных у жыцьці навыкаў для выхаванцаў школаў-інтэрнатаў, спэктаклі для сьляпых ды іншае.
Сёлетні Social Weekend — ужо дзясяты рэспубліканскі конкурс. Мерапрыемствы ладзяцца ад 2013 году, і за ўвесь час у конкурсах паўдзельнічала больш за 1200 праектаў. Сума фінансавай дапамогі перавысіла 140 тысяч даляраў. Партнэрамі конкурсу ёсьць Tut.by, Velcom, Realt.by, Startidea.by, МаеСэнс, Hoster.by і іншыя.
Праз праект былі прафінансаваныя пошукавы атрад «Ангел», дабрачынная крама KaliLaska, суполка дапамогі бяздомным жывёлам «ЗооШанс» і іншыя. На папярэднім конкурсе перамог праект зручнага адзеньня для інвалідаў-вазочнікаў Tikota Inclusive, гранты атрымалі фэстываль усынаўленьня «Родныя людзі», праграма дапамогі ў афармленьні дакумэнтаў «Док-Мэнэджэр», школа выбару прафэсіі Can Be і іншыя.
