Лінкі ўнівэрсальнага доступу

Суд над актывістам у «канцлягерным адзеньні»: начальніцы з крамы кажуць, што Грык брыдкасловіў


Рыгор Грык у судзе

У Баранавічах адбылося чарговае судовае паседжаньне ў справе актывіста Рыгора Грыка. Яго вінавацяць у несанкцыянаваным пікеце, а таксама ў брыдкаслоўі на працы, калі ён прыйшоў туды ў канцлягернай адзежы.

Судзьдзя Васіль Петрыў адклаў суд на 27 кастрычніка на 14:30, задаволіўшы хадайніцтва адваката, каб выклікаць дадатковых сьведак ды запытаць запіс з камэраў назіраньня крамы, дзе працаваў Рыгор Грык.

Сёньня ў судзе дапыталі сьведак — траіх прадстаўнікоў крамы, дзе працаваў Рыгор Грык да таго дня, як прыйшоў на працу ў канцлягернай адзежы. Таксама ў якасьці сьведак па справе аб пікетаваньні 27 верасьня былі дапытаныя міліцыянты.

Дырэктарка крамы, дзе Грык працаваў грузчыкам, яе намесьніца і начальніца па пэрсаналу зь Менску даводзілі ў судзе, што актывіст нецэнзурна выказваўся ў іх прысутнасьці ў краме, не рэагаваў на іх заўвагі і не жадаў зьмяніць канцлягерную адзежу.

Судзьдзя пытаўся ў некаторых сьведак, чаму яны лічаць супрацьпраўным тое, што на Грыку была такая адзежа. Найбольш экспрэсіўным адказам былі словы начальніцы па пэрсаналу сеткі крамаў «MART INN», якая прапаноўвала Грыку сысьці з крамы, паведаміўшы, што ён звольнены:

«У нас ёсьць краіна, якая прайшла празь Вялікую Айчынную вайну. [...] Мы ўсе ведаем пра гэта не паводле чутак...»

Судзьдзя: «Ну ён жа (Грык. — РС) сказаў, што ён сябе асацыяваў зь вязьнямі Бухэнвальду. Ён жа ня з ворагамі сябе асацыяваў...»

Сьведка: «Яму была прамая дарога на вуліцу — ідзі і асацыюй сябе далей. Чаму рабіць гэты эпатаж у краме? На якой падставе?»

Сьведка з боку абароны, жыхар Баранавічаў Аляксандар Вайцешык, які прысутнічаў у той дзень у краме, сказаў суду, што ня чуў, каб Рыгор Грык брыдкасловіў.

Рыгор Грык сказаў Свабодзе, што зусім ня бачыць лёгікі ў абвінавачаньні ў брыдкаслоўі: маўляў, навошта яму гэта было рабіць у час, калі ён быў у канцлягернай адезжы і выклікаў больш пільную ўвагу з боку начальства?

Паводле другога пратаколу на Рыгора Грыка — за быццам бы несанкцыянаваны пікет — былі апытаныя міліцыянты. Судзьдзя Васіль Петрыў акцэнтаваў увагу на пытаньнях, ладзіў пікет Грык на тэрыторыі парку ці па-за ёй. Баранавіцкія праваабаронцы выказваюць думку, што, магчыма, у гэтай справе «спрабуюць зрабіць так, каб атрымалася, што пікет быў у забароненым месцы».

Ад абароны ў справе пікетаваньня выступіў берасьцейскі палітык, сябра БСДП(Г) Ігар Маслоўскі, які ў той час, калі адбыўся пікет, быў даверанай асобай кандыдата на прэзыдэнта Тацяны Караткевіч. Ігар Маслоўскі сказаў, што пікет адбываўся ў межах выбарчага заканадаўства ў падтрымку кандыдата паводле заяўнага прынцыпу і не падпадае пад закон аб правядзеньні масавых мерапрыемстваў.

«Калі ў нас усе роўныя перад законам, то такія адміністрацыйныя справы павінны быць заведзеныя на дзясяткі ці нават сотні актывістаў БРСМ, „Белай Русі“, ФПБ. Таму што яны таксама арганізоўвалі, удзельнічалі ў такіх пікетах, і на гэтых пікетах не было давераных асобаў кандыдата Аляксандра Лукашэнкі, як не было і мяне ў Баранавічах на пікеце Рыгора Грыка. Суду я даводзіў, што гэта ўсё пачалося пасьля выбараў, а раней органы ўлады, выбарчая камісія ня мелі ніякіх прэтэнзіяў да пікету, яго ўдзельнікаў і да мяне як заяўніка гэтага пікету».

Пасьля завяршэньня сёньняшняга паседжаньня Рыгор Грык выказаў Свабодзе меркаваньне, што сумняецца, ці пераможа ў судзе, але вінаватым сябе ня лічыць.

На суд Грыка прыйшлі больш за дзясятак актывістаў ды журналістаў.

Глядзець камэнтары (1)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG