Лінкі ўнівэрсальнага доступу

Navi, адзіны беларускамоўны канкурсант на Эўравізіі, верыць у справядлівасьць адбору


Сёлета на нацыянальным адборы на Эўравізію ня будзе журы, а будзе толькі народнае галасаваньне. І гурт Navi заклікае падтрымаць сябе як адзінага беларускамоўнага канкурсанта.

Беларускі рок-гурт Navi, які бярэ ўдзел у фінальным адборы на Эўравізію, заклікаў у сацсетках падтрымаць беларускую мову на міжнародным конкурсе. Сёлета іх песьня «Гэта зямля» — адзіная беларускамоўная на нацыянальным адборы. Трансьляцыя фіналу адбору пройдзе 22 студзеня а 22:00 у жывым эфіры тэлеканалаў «Беларусь-1» і «Беларусь-24», гледачы змогуць прагаласаваць за найлепшага канкурсанта.

«Гэтую акцыю мы запусьцілі пры падтрымцы „Арт-сядзібы“, — распавёў Свабодзе ўдзельнік гурту Navi Арцём Лук’яненка. — Яны былі ініцыятарамі, вырашылі дапамагчы нам — мы пагадзіліся і зрабілі такі заклік. Сэнс акцыі — выказацца за беларускую мову на Эўравізіі. Беларуская мова сапраўды мілагучная, гэта вядомы факт, але ў гісторыі яшчэ не было такога, каб беларуская мова гучала на гэтым конкурсе.

Склаўся такі стэрэатып, што на Эўравізіі не з англамоўнай песьняй — як гэта ўвогуле магчыма? Гэта дрэнна, трэба гэты стэрэатып разбураць. Таму я ўпэўнены, што трэба кінуць такі заклік».

Пакуль песьня «Гэта Зямля» прадстаўленая толькі ў аўдыёфармаце, але ў выпадку перамогі на конкурсе гурт абяцае прадставіць яскравае анімаванае відэа:

«Наогул, у нас ёсьць канцэпцыя, зьвязаная з экалягічнымі і турыстычнымі праблемамі Беларусі, мы падвязваем яшчэ тэму птушак. Вобраз птушак будзе і ў самой песьні, і ў строях, і ў тым роліку, які цяпер малюецца. Праз птушак мы хочам паказаць, што ў нас сапраўды ёсьць на што зьвярнуць увагу».

Раней на нацыянальных адборах розных гадоў ня раз гучала беларуская мова, але нават кампазыцыя «Кола млына» Алега Хаменкі і гурту «Палац», упадабаная многімі слухачамі, не прайшла ў фінал нацыянальнага адбору ў 2008 годзе. У фіналах жа заўсёды перамагалі, а потым і прадстаўлялі Беларусь на конкурсе, выканаўцы расейскамоўных ці англамоўных эстрадных песень.

Скандалы з адборам на Эўравізію вымусілі зьмяніць фармат галасаваньня, у якім раней дамінавала прызначанае дзяржавай журы. Цяпер дэлегата на сьпеўны форум будуць абіраць па выніках глядацкага галасаваньня. І гурт Navi верыць у справядлівасьць такога фармату:

«У гэтым годзе я больш чым упэўнены, што ўсё будзе па-справядліваму. Тое, што людзі пішуць, што там усё куплена, што ў нас усё куплена... Я сапраўды бачыў шмат такіх камэнтароў, але людзям проста падабаецца так пісаць. У гэтым годзе ня будзе ніякіх журы, будуць толькі людзі. Дзесяць маладых выканаўцаў, няма такой відавочнай зоркі. Усё будзе па-справядліваму, гэта факт, шмат з кім мы працуем-перасякаемся, дакладна ведаем, што ў гэтым адборы нікому ня трэба кагосьці там ставіць на першае месца».

Глядзець камэнтары (1)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG