Былы міністар замежных справаў Беларусі Пятро Краўчанка скончыў працу над новай кніжкай. Пра гэта былы кіраўнік замежнапалітычнага ведамства сказаў карэспандэнту Свабоды:
«Засталося толькі вызначыцца са зьмястоўнай і прыгожай назвай. Пакуль яна выключна працоўная: „Пятро Краўчанка: палітык і дыплямат“.
Адметнасьць кнігі ў тым, што ў ёй шмат фактаў, якія раней нідзе ня згадваліся альбо вельмі мала асьвятляліся. Так што, думаю, яна будзе карыснай як для гісторыкаў беларускай сучаснасьці, так і для звычайных людзей, маіх сучасьнікаў, на вачах якіх рабілася найноўшая беларуская гісторыя. Гарантую, што кожны знойдзе тут шмат і цікавага, і раней невядомага.
Цяпер я заняты пошукам грошай выдаць кнігу».
У 2006 годзе ў Маскве на расейскай мове выйшла кніжка Краўчанкі «Беларусь на переломе». Наступным годам гэтыя мэмуары экс-міністра надрукавалі па-беларуску ў «Кнігарні «Нашай нівы». У параўнаньні з расейскім варыянтам «Беларусь на ростанях» была істотна дапоўненая, дадаліся й фатаздымкі.
Пятро Краўчанка займаў пасаду першага міністра замежных справаў незалежнай Рэспублікі Беларусі з 1990 па 1994 год. Падчас першых прэзыдэнцкіх выбараў уваходзіў у штаб тагачаснага прэмʼера Вячаслава Кебіча. Пасьля перамогі Аляксандра Лукашэнкі пайшоў у адстаўку, а на ягонае месца прыйшоў міністрам Уладзімер Сянько.
