У ёй служыць двухразовы чэмпіён сьвету па кікбоксінгу Генадзь Варакса і чэмпіён Эўропы па фры-файце Дзьмітры Собалеў.
На ўзбраеньні падразьдзяленьня — стралковая зброя, БТР-80, вадамёты, гранатамёты ГМ-94, ГМ-93, сьлезацечныя, сьвятлошумавыя, дымавыя і асколкавыя гранаты, помпавае ружжо Таurus ST-12.
Рота забесьпячэньня сакрэтных апэрацыяў (РЗСА) створаная ў межах элітнай вайсковай часткі 3214.
Газэта «На страже», дзе зьявіўся артыкул пра новае фармаваньне, піша, што доўгі час інфармацыя пра роту была сакрэтам. Падразьдзяленьне зьявілася з ініцыятывы намесьніка міністра ўнутраных спраў генерал-маёра Караева. Байцы рот могуць выяжджаць у любы раён краіны для пошуку незаконных узброеных фармаваньняў, барацьбы з дывэрсійна-выведнымі групамі праціўніка, пошуку зьбеглых асуджаных, спыненьня масавых беспарадкаў.
Паводле выданьня, байцы займаюцца паводле адмысловай праграмы, а на заняткі па баявой падрыхтоўцы часу адведзена ў паўтара раза больш, чым у іншых падразьдзяленьнях.
«Калі ў іншых падразьдзяленьнях праводзяцца агульныя заняткі для снайпэраў, гранатамётчыкаў і кулямётчыкаў, то ў РЗСА для кожнага спэцыяліста свой курс навучаньня, — прыводзіць «На страже» словы камандзіра роты па ідэалягічнай працы старшага лейтэнанта Ільлі Кудрына. — Асабовы склад могуць прыцягваць падчас сумесных апэрацыяў з рознымі сілавымі структурамі для аказаньня ім агнявой падтрымкі».
Сымбалем роты абралі ястраба.
