Лінкі ўнівэрсальнага доступу

Гомельская міліцыя складае пратаколы на ўдзельнікаў «Маршу недармаедаў»


Леанід Судаленка

24 лютага ўчастковы інспэктар Цэнтральнага РАУС Гомеля, маёр міліцыі Сяргей Жытнікаў склаў адміністрацыйны пратакол на прававога інспэктара Беларускага незалежнага прафсаюзу працаўнікоў радыёэлектроннай прамысловасьці Леаніда Судаленку — за ўдзел у «Маршы недармаедаў», які прайшоў у абласным цэнтры 19 лютага.

«Я не зьбіраюся хавацца, — кажа Леанід Судаленка. — Пагадзіўся пайсьці ў міліцыю па званку, не чакаючы позвы. Маёр Жытнікаў склаў у дачыненьні да мяне пратакол паводле часткі 1 артыкула 23.34 КаАП — парушэньне парадку арганізацыі ці правядзеньня масавых мерапрыемстваў. Патлумачыў, што мяне міліцыя ідэнтыфікавала на падставе здымкаў. Запытаў яшчэ, ці буду я пярэчыць, што знаходзіўся ў калёне, ішоў па ходніках вуліцы Савецкай ад плошчы Паўстаньня і да плошчы Леніна, дзе выступаў на мітынгу. Я падпісаў пратакол, зрабіўшы на яго пісьмовыя заўвагі: «З пратаколам ня згодны, аргумэнты нязгоды прадстаўлю суду. Апрача таго, выказваю нязгоду з пачаткам вядзеньня ў адносінах да мяне адміністрацыйнага працэсу».

Леанід Судаленка сказаў, што маёр міліцыі адхіліў усе ягоныя хадайніцтвы, у тым ліку на прысутнасьць здымачнай групы. Не было далучана да справы і пісьмовае рашэньне камітэту ААН па правах чалавека, які 28 сьнежня 2015 году прызнаў неабгрунтаванай забарону Гомельскім гарвыканкамам ягонай просьбы наконт правядзеньня масавага мерапрыемства ў Дзень абароны правоў чалавека.

«Хадайнічаў таксама, каб міліцыя прыпыніла вядзеньне супраць мяне адміністрацыйнай справы, пакуль урад Беларусі ня зробіць захадаў адносна прывядзеньня беларускага заканадаўства аб масавых мерапрыемствах у адпаведнасьць зь міжнароднымі абавязаньнямі, як тое рэкамэндаваў Камітэт ААН. Але ніводнага з хадайніцтваў маёр Жытнікаў да справы не далучыў. Папярэдзіў толькі, што пратакол дашле ў суд, і ўжо адтуль мне трэба чакаць позвы на разбор», — сказаў Леанід Судаленка.

Напярэдадні з Цэнтральнага РАУСу тэлефанавалі яшчэ васьмі грамадзкім актывістам і блогерам, якія, на думку міліцыянтаў, спрычыніліся да арганізацыі найбольш масавай за апошнюю чвэрць стагодзьдзя акцыі пратэсту — «Маршу недармаедаў». Тэлефонныя запрашэньні ў міліцыю атрымалі Васіль Палякоў, Уладзімер Кацора, Анатоль Паплаўны, Уладзімер Няпомняшчых, Максім Філіповіч, Дзьмітры Сабураў, Мікалай Пяшко, Віктар Рубцоў.

Васіль Палякоў
Васіль Палякоў

«Сёньня на паседжаньні створанага нядаўна камітэту руху „За адмену дэкрэту № 3“, — тлумачыць намесьнік старшыні АГП Васіль Палякоў, — было вырашана не хадзіць у міліцыю безь пісьмовай позвы. Мы павінны бачыць, хто і ў якасьці каго выклікае актывістаў. Такая сумятлівая рэакцыя праваахоўных органаў празь пяць дзён пасьля „Маршу недармаедаў“ сьведчыць, што паступіла каманда разабрацца з найбольш актыўнымі яго ўдзельнікамі. Відаць, улады напалохаліся незвычайнай актыўнасьці гараджанаў. Але, як падаецца, уладам трэба больш думаць, як адмяніць дэкрэт, а не як прыціснуць апазыцыйных актывістаў. У іншым разе сацыяльнае напружаньне будзе толькі ўзрастаць».

Паводле маёра Жытнікава, позвы ў міліцыю дасланыя ўсім вышэйзгаданым удзельнікам нядзельнага шматтысячнага «Маршу недармаедаў».

Тым часам у камэнтарах наконт выклікаў актывістаў у міліцыю гамельчукі пішуць: «Сорам будзе, калі цяпер мы не падтрымаем тых людзей, якія зарганізавалі гэты пратэст мірна і цывілізавана. Інакш хто мы будзем?»

Гомель 19 лютага
Гомель 19 лютага

Ваша меркаваньне

Паказаць камэнтары

XS
SM
MD
LG