На рынку фэервэркаў, што на паўночнай ускраіне Мэхіка, сталіцы Мэксыкі, 20 сьнежня адбылася сэрыя выбухаў, у якой, як перадае The Guardian, загінулі прынамсі 29 чалавек, параненыя 70. Больш за тузін дзяцей з апёкамі 90% цела былі дастаўленыя ў Тэхас (ЗША) для лячэньня.
«Усё было ў агні, усё ўзрывалася. Ляталі камяні, кавалкі цэглы, усё лятала», — апісвае падзеі жанчына, якая была на рынку падчас выбуху.
Мясцовыя ўлады вядуць расьсьледаваньне здарэньня. Губэрнатар штату Мэхіка абяцаў знайсьці і пакараць адказных, а таксама аказаць эканамічную дапамогу тым, хто праз трагедыю страціў сродкі да існаваньня.
Рынак, на якім здарыліся выбухі, называюць эканамічным апірышчам прыгараду, дзе шмат людзей зараблялі на вытворчасьці фэервэркаў, частка — у падпольных майстэрнях. Паводле мясцовых СМІ, у час выбухаў на рынку было 300 тонаў выбухоўкі.
Але, як кажа экспэрт піратэхнічнага інстытуту, рынак быў «адным з самых бясьпечных» у Лацінскай Амэрыцы, з дастатковай колькасьцю вольнай прасторы, каб прадухіліць ланцуговую рэакцыю. Яго перабудавалі пасьля катастрофы 2005 году, калі ад выбухаў пацярпелі 128 чалавек.