Украінскі прэзыдэнт абяцае перафарматаваць урад Азарава, зьмяніць законы 16 студзеня і амніставаць усіх, хто «не ўчыніў цяжкіх злачынстваў». Такія заявы ён зрабіў падчас сустрэчы з кіраўнікамі цэркваў і рэлігійных арганізацый.
Лідэраў апазыцыі асьвісталі і вымусілі прыслухацца да Майдану
Сустрэча ўладаў і парлямэнцкай апазыцыі, якая праходзіла ў сераду больш за чатыры гадзіны — прайшла безвынікова. Паводле Віталя Клічко, улады пагадзіліся вызваліць затрыманых на Грушэўскага людзей толькі пры ўмове спыненьня сілавых дзеяньняў. Актыўныя ўдзельнікі супраціву ўспрынялі гэтыя словы воклічамі незадаволенасьці. Таму лідэры апазыцыі абвясьцілі пра тое, што вуліца Грушэўскага становіцца часткай Майдану. Між тым, улады раней выказалі незадаволенасьць тым, што апазыцыя не асудзіла дзеяньні экстрэмістаў.
Пасьля заканчэньня перамоваў Віталь Клічко і Алег Цягнібок пайшлі не на Майдан, а на вуліцу Грушэўскага, дзе працягвалася перамір’е. Апазыцыянеры распавялі, што ўлады пагадзіліся зьмяніць меру стрыманьня для затрыманых актывістаў пратэсту, а МУС — не ўжываць агнястрэльную зброю (хоць да гэтага часу ўжываньне агнястрэльнай зброі з боку ўлады адмаўлялася). А ў наступны аўторак парлямэнт разгледзіць вылучаныя пратэстоўцамі патрабаваньні: у прыватнасьці, адстаўку ўраду і амністыю для ўдзельнікаў закалотаў.
Аднак улады вылучылі таксама свае ўмовы — спыненьне сілавых дзеяньняў і стварэньне буфэрнай зоны паміж актыўнымі ўдзельнікамі супраціву і працаўнікамі МУС. Фактычна, актывісты маюць пакінуць барыкады і адступіць з вуліцы Грушэўскага. Таму сярод актывістаў супраціву было шмат незадаволеных тым, што апазыцыйныя лідэры, не дасягнуўшы рэальных вынікаў, заклікаюць падоўжыць перамір’е.
Пасьля на майдане Незалежнасьці Віталь Клічко прызнаў, што многім яго выступ не спадабаецца. Ён прызнаў, што ўлады вядуць перамовы несумленна, але адзначыў, што перамовы варта працягваць — каб не праліць кроў. Затое лідэр «Удар» заклікаў да страйку.
Алега Цягныбока, які распавядаў аб хадзе перамоваў, пачалі досыць гучна абсьвістваць. Алег Цягныбок заклікаў вызначыцца — ладзіць далей супраціў ці пагадзіцца на перамір’е. Большасьць удзельнікаў мітынгу прагаласавалі за супраціў. Таму Арсень Яцанюк абвясьціў аб тым, што барыкады на вуліцы Грушэўскага становяцца тэрыторыяй Майдану.
«Рашэньне прынятае. Мы аб’яўляем Грушэўскага тэрыторыяй Майдану, — сказаў Яцанюк. — Ні кроку назад. Я прашу ўсіх — дысцыпліна. Гэта падтрымліваецца? Дакладнае выкананьне загадаў. Гэта падтрымліваецца? Або пашыраем мы тэрыторыю Майдана? Зьвяртаюся да Андрэя Парубія пашырыць тэрыторыю Майдану».
Раней міністар юстыцыі Олэна Лукаш, якая ўваходзіць у працоўную групу па ўрэгуляваньні палітычнага крызісу, заявіла аб працягу перамоваў. Яна таксама выказала шкадаваньне з нагоды таго, што «лідэры апазыцыі адмовіліся асудзіць экстрэмісцкія дзеяньні».
«Кроў, якая пралілася ва Ўкраіне, можа працячы і да цябе, Эўропа»
Удзельнікі «Грамадзкага сэктару Эўрамайдану» зладзілі сёньня акцыю пад сьценамі амбасады Нямеччыны ў Кіеве, на якім заклікалі эўрапейскіх кіраўнікоў санкцыямі адрэагаваць на апошнія падзеі ва Ўкраіне пад лёзунгам: «Кроў, якая пралілася ва Ўкраіне, можа працячы і да цябе, Эўропа».
Удзельнікі акцыі паведамілі, што перадалі ў амбасаду Германіі пералік усіх дэпутатаў, якія прагаласавалі за «законы 16-га студзеня», а таксама сьпіс кіраўнікоў і супрацоўнікаў МУС, якія, як яны лічаць, удзельнічалі ў гвалтоўных дзеяньнях супраць удзельнікаў Эўрамайдану.
У звароце актывістаў да эўрапейскай супольнасьці заклікаюць правесьці антыкарупцыйнае расьсьледаваньне і праверыць назапашаныя сродкі ўкраінскіх чыноўнікаў і іх сваякоў, і не даваць ніякіх дзяржаўных крэдытаў, пакуль «законы 16 студзеня» не адменяць.
Прычынай акцыі перад пасольствам Нямеччыны стала заява канцлеркіАнгелы Мэркель, якая сказала ўчора, што яе краіна ня бачыць пакуль падставаў для санкцыяў супраць чыноўнікаў-парушальнікаў правоў чалавека ва Ўкраіне.
Актывісты таксама паведамілі, што маюць намер падаць падобныя сьпісы і заклікі і ў амбасады Канады, ЗША і ўсіх дзяржаваў Эўразьвязу
01:2125.1.2014
Міліцыя зьвінаваціла апазыцыю ў парушэньні замірэньня
У міліцыі заяўляюць, што перамір’е на вуліцы Грушэўскага парушылі пратэстоўцы. Пра гэта заявіла прэс-служба Міністэрства ўнутраных спраў.
У ведамстве адзначылі, што актывісты пачалі кідаць у кардон праваахоўнікаў камяні і бутэлькі з запальнай сумесьсю.
«Нягледзячы на працяглыя перамовы апазыцыі і ўлады і папярэднія дамоўленасьці аб перамір’і, некантраляваныя лідэрамі пратэстаў радыкальныя сілы зноў пачалі правакаваць міліцыю на ўжываньне сілы», — гаворыцца ў паведамленьні.
У МУС адзначаюць, што ў чацьвер міністар унутраных спраў Віталь Захарчанка запэўніў, што міліцыя гатовая да мірнага ўрэгуляваньня канфлікту ў выпадку выкананьня дамоўленасьцяў, але гэтыя заклікі засталіся не пачутымі ўдзельнікамі закалотаў.
Як вядома, раней паведамлялася, што пратэстоўцы перайшлі да актыўных дзеяньняў, калі «Беркут» адкрыў па іх агонь гумовымі кулямі і быў паранены актывіст.
01:1025.1.2014
А улица Грушевского в Киеве по звуку и огню опять напоминает литейный цех металлургического завода #євромайдан
У Галасееўскім раёне невядомыя застрэлілі міліцыянта. Пра гэта паведамілі ў прэс-службе МУС.
Цела міліцыянта з агнястрэльным раненнем галавы вечарам у пятніцу, 24 студзеня, выявілі ахоўнікі, якія працуюць на будаўніцтве непадалёк ад месца зьдзяйсьненьня злачынства.
Мужчыны пачулі страляніну і пабеглі праверыць, што адбылося. Убачыўшы забітага, яны адразу выклікалі міліцыю.
Сьведкі бачылі, як двое невядомых ўцякалі зь месца здарэньня. Ужо вызначана, што пацярпелы — 27 гадовы парцаўнік аддзелу дзяржаўнай службы аховы Галасееўскага аддзелу міліцыі. Міліцыянт кіраваўся са службы дадому бяз зброі.
Пражываў міліцыянт непадалёку ў інтэрнаце «Беркуту». На месцы забойства працуе сьледча-апэратыўная група.
20:5024.1.2014
Клічко: «Майдан разыдзецца толькі пасьля адстаўкі Януковіча»
Віталь Клічко, лідэр партыі «Ўдар», заявіў, што пратэстоўцаў на Эўрамайдане задаволіць толькі адстаўка Віктара Януковіча.
«Яшчэ месяц таму Майдан разышоўся б, калі б была адстаўка Захарчанкі з пасады міністра ўнутраных спраў. Ячшэ два тыдні таму можна было задаволіць людзей адстаўкай ураду. Сёньня людзі вымагаюць адстаўкі прэзыдэнта», — сказаў Клічко.
«Учора з рашэньнем пасьля нарады ў прэзыдэнта я пайшоў на Грушэўскага да людзей і ў адказ я пачуў сьвіст. Ён быў адрасаваны ня ў мой бок, а сьведчыў пра іх нежаданьне і абурэньне супраць прыняцьця вынікаў перамоваў. Яны такога не чакалі», — дадае Клічко.
Сёньня Віктар Януковіч паведаміў пра сваю гатоўнасьць перафарматаваць урад Мікалая Азарава і зьмяніць прынятыя 16 студзеня законы, якія абмяжоўваюць правы грамадзянаў. http://interfax.com.ua/news/general/187351.html
20:4724.1.2014
Хмяльніцкі: міліцыянтаў з адміністрацыі гоняць партрэтамі Януковіча
Мітынгоўшчыкі ў Хмяльніцкім увайшлі ў памяшканьне абласнай дзяржаўнай адміністрацыі. Яны патрабуюць адстаўкі губэрнатара Васіля Ядухі.
Ідуць перамовы кіраўніцтва вобласьці з камэндантам мясцовага Эўрамайдану Юрыем Смалём. У гэты час мітынгоўшчыкі закідалі міліцыянтаў, што ахоўваюць будынак, партрэтамі Януковіча, паведамляе УНІАН.
Пратэст у Хмяльніцку
20:3924.1.2014
Януковіч: зьдзекі «Беркута» — гэта адказ на гвалт
Віктар Януковіч лічыць, што праваахоўныя органы падчас падзеяў у Кіеве дзейнічаюць адпаведна сваім паўнамоцтвам.
Патрыярх Філарэт падчас сустрэчы з прэзыдэнтам папрасіў яго пракамэнтаваць паведамленьні пра тое, што праваахоўнікі зьдзекуюцца з затрыманымі актывістамі. Адказ Віктара Януковіча быў наступным:
«Чаму вы не асуджаеце тых людзей, якія палілі тых маладых хлопцаў той сумесьсю, калі яны гарэлі і іх запальвалі? Чаму вы іх не асуджаеце? Распранулі. Безумоўна, такога нельга было рабіць. Але гвалт спараджае гвалт», — цытуе словы прэзыдэнта агенцтва УНІАН.
Відэа, на якім байцы «Беркута», зьдзекуюцца над распранутым на марозе актывістам Міхаілам Гаўрылюком і фатаграфуюцца, выклікала хвалю грамадзкага абурэньня ва Ўкраіне. МУС Украіны прызнало факты зьдзекаў і запэўніла, што прыме адпаведныя захады ў дачыненьні да сваіх супрацоўнікаў.
20:3824.1.2014
Данецкіх байцоў унутраных войскаў узнагародзілі мэдалямі за падзеі ў Кіеве
Мэдалі «Народная павага вайсковым праваахоўнікам» уручаныя 23 студзеня за ўзорнае выкананьне службова-баявых зад.аньняў па забесьпячэньні аховы грамадзкага парадку ў Кіеве. Пра гэта паведамляе прэс-служба ўнутраных войскаў Украіны.
Мэдалі атрымалі вайскоўцы з вайсковых частак 3057 (Марыупаль) і 3037 (Данецк) Усходняга тэрытарыяльнага камандаваньня.
19:0924.1.2014
Хлопца, зь якога зьдзекаваўся «Беркут», двойчы «прапускалі цераз шыхт»
Міхайла Гаўрылюк, якога захапіў «Беркут» і фатаграфаваў распранутым, уцёк зь лякарні, куды яго адправілі, і сьцьвярджае, што яго «двойчы прапускалі цераз шыхт» — білі між двума шыхтамі байцоў «Беркута».
Міхайла Гаўрылюк выйшаў да журналістаў у прэс-цэнтры Дому прафсаюзаў. Ён апавёў, што яго зацягнулі ў аўтазак, скруцілі, адрэзалі яму «чуб», пасьля распранулі, выгналі на вуліцу, фатаграфавалі і зноў зацягнулі ў аўтазак. Там яму адзін зь іншых затрыманых аддаў свае споднія штаны.
Відэа, на якім байцы «Беркута» зьдзекуюцца з распранутага дагала Міхайлы, было распаўсюджанае ўчора.
МУС Украіны выбачылася за дзеяньні «Беркута» і запэўніла, што прыме адпаведныя захады да тых, хто чыніў зьдзекі.
18:5324.1.2014
Януковіч: «Законы 16 студзеня будуць зьмененыя»
«Нашыя экспэрты адпрацоўваюць гэтае пытаньне і разам з апазыцыяй падрыхтуем кампрамісныя рашэньні.... Мы прагаласуем зьмены гэтых законаў і здымем пытаньні», — паведаміў Віктар Януковіч на сустрэчы з кіраўнікамі цэркваў і рэлігійных арганізацый.
16 студзеня Вярхоўная Рада Ўкраіны ўхваліла шэраг законаў, якія абмяжоўваюць правы грамадзянаў. Гэта выклікала чарговы ўсьплеск грамадзкай незадаволенасьці.
18:2924.1.2014
Януковіч: «Урад Азарава будзе перафарматаваны»
Прэзыдэнт Украіны паабяцаў, што ўрад будзе перафарматаваны на пазачарговай сэсіі Вярхоўнай рады 28 студзеня.
«...Мы перафарматуем урад, каб знайсьці аптымальны варыянт прафэсійнага складу ўраду, які працаваў бы на ўкраінскую дзяржаву», — сказаў Віктар Януковіч падчас сустрэчы з кіраўнікамі цэркваў і рэлігійных арганізацый.
Зьмена ўраду Мікалая Азарава застаецца адным з асноўных патрабаваньняў Эўрамайдана.
Ва Ўкраіне працягваецца сілавое супрацьстаяньне паміж уладай і Майданам. Чаму падзеі разьвіваюцца паводле сілавога сцэнару? Як ацаніць міжнародны кантэкст украінскіх падзей? Як у Беларусі рэагуюць на забурэньні ва Ўкраіне? Удзельнікі экспэртызы: журналіст Юрась Сьвірко з Кіеву і палітоляг Андрэй Фёдараў зь Менску.
Бацькі забітага на ўкраінскіх барыкадах Міхаіла Жызьнеўскага начным цягніком паедуць у Кіеў, каб забраць з моргу нябожчыка сына і пахаваць пад Гомелем на сямейных могілках.
24 студзеня ў цэнтры ўкраінскай сталіцы вачыма фатографа Паўла́ Зуб’юка
16:4724.1.2014
На Майдане ўшанавалі памяць загінулага беларуса
У Кіеве адбылася акцыя ўшанаваньня памяці беларуса Міхаіла Жызьнеўскага, які загінуў на Эўрамайдане 22 студзеня. На барыкадзе ўсталявалі бел-чырвона-белыя сьцягі. Людзі прынесьлі кветкі.
