Падчас сутыкненьняў паміж мітынгоўцамі і міліцыянтамі ў Кіеве пацярпеў фотакарэспандэнт агенцтва Reuters.
Як перадае УНІАН, паводле папярэдніх дадзеных, у грудзі яму трапіла святлошумавая граната, якая разарвала вопратку.
Пацярпелага адвялі да аўтамабіля хуткай мэдыцынскай дапамогі.
Раней пад Радай дзьве жанчыны атрымалі раненьні гумовымі кулямі.
Мітынгоўцы каля Вярхоўнай Рады каля 2 тысяч. Яны кідаюць камяні ў бок праваахоўнікаў, у адказ міліцыянты страляюць святлошумавымі гранатамі. Супраць мітынгоўцаў быў выкарыстаны сьлезацечны газ.
Мітынгоўцы рушылі ў наступ на калёну міліцыі. У адказ міліцыя пачала страляць. Падчас сутычак быў запалены грузавы аўтамабіль, які перакрывае рух па вуліцы Шаўкавічнай у бок Вярхоўнай Рады Ўкраіны.
Аўтамабіль палае побач з жылым домам. Вуліца Шаўкавічная зацягнута чорным дымам.
Крывавы дзень для Майдану. Але гэтым разам, у адрозьненьне ад падзеяў двухмесячнай даўніны, дэманстранты добра ўзброеныя. Фотагалерэя
Фотагалерэя:
Абвастрэньне сытуацыі ў Кіеве, 18 лютага 2014
Сутычкі пад Вярхоўнай Радай Украіны. Пад будынкам парлямэнту ў супрацьстаяньні міліцыі і мітынгоўцаў у ход пайшлі пэтарды і дубінкі. Трыбуна ў самой Вярхоўнай Радзе заблякаваная. Мітынгоўцы запалілі шыны на вуліцы Грушэўскага з боку барыкад.
Бой у парку ля будынку Вярхоўнай Рады
Мітынгоўцы завялі аўтамабіль, які перакрываў праезд вуліцы Грушэўскага, і ад’ехалі, вызваліўшы праезную частку. На праезнай часткі застаюцца яшчэ 2 аўтамабілі.
Мітынгоўцы паступова праходзяць за агароджу і спрабуюць разблякаваць вуліцу Грушэўскага.
На вуліцы Шаўкавічнай у Кіеве сілавікі пачалі ўжываць сьвятлошумавыя гранаты, яны маюць пры сабе стрэльбы. Ёсьць параненыя.
Тым часам парлямэнцкая апазыцыя ў Вярхоўнай Радзе блякуе трыбуну, патрабуючы ўключыць у парадак дня пытаньне аб аднаўленьні дзеяньня Канстытуцыі 2004 году.
У раёне Вярхоўнай Рады мітынгоўцы прарвалі міліцэйскі кардон
На скрыжаваньні каля Вярхоўнай Рады некалькі ўдзельнікаў мітынгу забраліся ў аўтамабілі, якія былі перашкодай на іх шляху, і выціснулі адтуль байцоў унутраных войскаў.
На дадзены момант мітынгоўцы пераадолелі аўтамабілі і прарвалі ачапленьне вайскоўцаў унутраных войскаў. З боку ўнутраных войскаў каля Вярхоўнай Рады падцягнуўся «Беркут». Чуваць выбухі пэтардаў, у ход пайшлі дубінкі.
На Грушэўскага мітынгоўцы і міліцыянты перайшлі да актыўных дзеянняў.
Кідаюць кактэйлі Молатава #євромайдан http://t.co/RcPW2jNyHz
Цэнтральны офіс Партыі рэгіёнаў быў спачатку падпалены кактэйлем Молатава, а пазьней яго захапілі пратэстоўцы.
Мітынгоўцы зайшлі ў офіс Партыі рэгіёнаў на вуліцы Ліпскага ў Кіеве. Спачатку людзі ў масках закідалі будынак камянямі, кінулі бутэльку з запальнай сумесьсю, пачаўся пажар. З офісу вынесьлі партрэт Януковіча.
Дэпутат ад партыі «Бацькаўшчына» Леся Арабец паведамляе пра сьмерць трох мітынгоўцаў.
«Тры трупы ў доме афіцэраў. Нашых. Яшчэ 7 пры сьмерці». «Хуткія» не пускаюць!!!", — напісала яна на сваёй старонцы ў Facebook.
Лекары пацьвярджаюць сьмерць траіх дэманстрантаў
Лекар Вольга Багамолец, якая каардынуе мэдычную дапамогу Эўрамайдану, заяўляе аб трох загінулых, якія знаходзяцца ў Доме афіцэраў, дзе разьмяшчаецца мэдпункт пратэстоўцаў.
Як паведаміла Багамолец Радыё Свабода, мэдпункт знаходзіцца цяпер з боку міліцыі.
У Міністэрстве аховы здароўя аб колькасьці параненых пакуль не паведамляецца і абяцаюць даць яе пасьля 15:00.
У міліцыі заявілі, што пяцёра вайскоўцаў унутраных войскаў атрымалі агнястрэльныя раненьні, агулам пацярпелі 37 міліцыянтаў.
У рэгіёнах татальная мабілізацыя на кіеўскі Майдан
У Львове і Цярнопалі абвясьцілі ўсеагульную мабілізацыю. Увечары з абодвух гарадоў адправяць аўтакалёны і аўтобусы зь людзьмі , якія павінны ўзмацніць самаабарону ў Кіеве.
Запіс добраахвотнікаў пачаўся і гэта зьвязана з падзеямі ў цэнтры Кіева, дзе працягваюцца сутычкі паміж дэманстрантамі і сілавікамі.
Штаб нацыянальнага супраціву Цярнопаля просіць добраахвотнікаў браць з сабой цёплыя рэчы і сродкі абароны. У Львове і Цярнопалі людзі зьбіраюцца на Майданах, дзе могуць пачуць аб апошніх падзеях і паслухаць актывістаў. Лідэр УА «Свабода» Алег Цягнібок заклікаў усіх мужчын неадкладна ехаць у Кіеў.
