Двое зь іх пакараныя адміністрацыйным арыштам на 10 сутак, трэцяя аштрафаваная на адзін мільён васямсот тысяч рублёў. Іх абвінавацілі ў дробным хуліганстве.
Яны прызналі сваю віну цалкам і былі гатовыя аплаціць штрафы ў кароткі тэрмін.
Разгляд спраў заняў 20 хвілін, пры гэтым судзьдзя нават не выходзіў, каб прыняць рашэньне. Ня ўсе ахвотныя змаглі трапіць на працэс, паведамляе праваабарончы сайт «Вясна».
Яшчэ на двух затрыманых падчас канцэрту склалі пратаколы паводле артыкула за выраб, распаўсюд альбо захоўваньне экстрэмісцкіх матэрыялаў. Аднак дакумэнты накіраваныя на дапрацоўку ў РУУС.
Падчас панк-вечарыны ў менскім клюбе «Піраты» ў залю ўварваліся амапаўцы, некаторыя ў масках. Усіх прысутных зьнялі на камэру, перапісалі іх дадзеныя і прымусілі разысьціся. Затрыманых удзельнікаў вечарыны на нейкі час замкнулі ў клюбе, не дазвалялі адказваць на мабільныя званкі. Сілавікі ад камэнтароў адмовіліся.
