Лінкі ўнівэрсальнага доступу

Менскую прастору «Цэх» выселілі, не назваўшы прычыны


Крэатыўная прастора «Цэх», архіўнае фота

Культурная прастора «Цэх» страціла памяшканьне на менскай Кастрычніцкай вуліцы: арэндадаўца і ўладальнік суседняга з «Цэхам» бару «Хуліган» Аляксандар Астрашэўскі два дні таму паведаміў «Цэху», што ім трэба «як мага хутчэй» сабраць рэчы і выехаць. Рашэньне было прынятае ў час выставы пра цэнзуру і самацэнзуру.

Як кажа Свабодзе дырэктарка «Цэху» Юлія Дарашкевіч, арэндадаўца адмовіўся назваць прычыны «высяленьня», але быў вельмі катэгарычны:

Юлія Дарашкевіч, архіўнае фота
Юлія Дарашкевіч, архіўнае фота

«Мы губляемся, мы ня ведаем, якія могуць быць прычыны, — кажа Дарашкевіч. – Мы існуем чатыры з паловай гады. Калі б быў нейкі ўзровень крамолы, даўно ўжо па нас бы прыйшлі. Калі мы пачыналі, мы былі ледзь не адзінай такой пляцоўкай. Цяпер жа шмат розных пляцовак, выставаў, лекцыяў розных. Я ня думаю, што гэта такая ўвага ідэалягічнага кшталту… Хаця хто ведае!

Цяпер на Кастрычніцкай вуліцы адкрылася шмат прастораў, прыйшлі такія гульцы на культурным полі, у якіх значна большыя магчымасьці, чым у нас. Я не бяруся нешта прагназаваць, але выглядае на тое, што мы, магчыма, сталі для кагосьці нязручнымі, лішнімі, нейкай перашкодай.

Дакладна ведаю, што прычына не фінансавая, бо мы плацілі досыць вялікую арэнду, плацілі яе спраўна, цяпер у нас памяшканьне аплачанае да 9-га. Мне б самой хацелася ведаць сапраўдную прычыну».

Дарашкевіч кажа, што супрацоўнікі «Цэху» пакуль занятыя пакаваньнем рэчаў і рыхтуюцца шукаць новае памяшканьне або прыдумляць новы фармат. «Цэх» мае шмат доўгатэрміновых і рэгулярных праектаў, ён партнэр World Press Photo, мае ўласную фатапрэмію і мэдыяшколу, плянавалася вялікая выстава на вясну. Дарашкевіч перакананая, што дзейнасьць «Цэху» ня спыніцца.

* * *

«Цэх» ужо высялялі ў 2015 годзе з памяшканьня на праспэкце Незалежнасьці, 58/6. Тады прычына таксама афіцыйна не называлася. У сеціве тады зьявіліся адмысловыя хэштэгі #ЦЭХживи і #спасёмЦЭХ – карыстальнікі заклікалі пісаць лісты да арэндадаўцы – а гэта быў банк BelSwissBank – з просьбай працягнуць дамову арэнды.

Дарашкевіч кажа, што днямі, перад цяперашнім высяленьнем, ёй тэлефанаваў чалавек з БСБ-банку, які «добра прыклаўся» да мінулага высяленьня, і прасіў «не трымаць зла». Памяшканьне, якое «Цэх» займаў да 2015 году, з таго часу пуставала.

Ваша меркаваньне

Паказаць камэнтары

XS
SM
MD
LG