Пра вырак паведамляе азэрбайджанскае дзяржаўнае агенцтва Azərtac.
Рубэну Варданьяну выставілі больш за 40 абвінавачаньняў, уключаючы «фінансаваньне тэрарызму», «стварэньне незаконных узброеных фармаваньняў», «незаконнае перасячэньне мяжы», а таксама «наўмыснае забойства» і «гвалтоўны захоп улады».
Варданьян віны не прызнаваў. Абвінавачаньне прасіла для яго пажыцьцёвы тэрмін зьняволеньня.
Варданьяна затрымалі 27 верасьня 2023 году на мяжы з Армэніяй пры спробе пакінуць Карабах, тэрыторыю якога цалкам вярнуў пад свой кантроль Азэрбайджан у выніку ваеннай апэрацыі.
Судовы працэс над Варданьянам і іншымі кіраўнікамі НКР пачаўся ў студзені 2025 году. Варданьян сьцьвярджаў, што сьледзтва і суд праходзяць з парушэньнямі: справу разглядае вайсковы трыбунал, абарона не атрымала поўнага доступу да матэрыялаў, а абвінавачаньне зьмяшчае «грубыя памылкі». У СІЗА ён двойчы абвяшчаў галадаваньне.
Азэрбайджанскі бок сьцьвярджае, што працэсуальныя правы Варданьяна, уключаючы абарону і выкарыстаньне мовы, якою ён валодае, былі цалкам забясьпечаныя.
Рубэн Варданьян — заснавальнік брокерскай кампаніі «Тройка Диалог» і бізнэс-школы «Сколково», раней уваходзіў у сьпіс найбагацейшых людзей Расеі. У 2022 годзе ён адмовіўся ад расейскага грамадзянства і пераехаў у Нагорна-Карабаскую рэспубліку.
