Міжнародная фэдэрацыя правоў чалавека накіравала ліст міністру замежных спраў Беларусі Ўладзімеру Макею.
Тэкст звароту прыводзіцца на сайце Праваабарончага цэнтру «Вясна».
У звароце нагадваецца пра меркаваньне Камітэту па правах чалавека ААН, які ў 2014 годзе, калі Алесь Бяляцкі яшчэ быў за кратамі, прызнаў, што Беларусь парушыла правы Бяляцкага на свабоду і асабістую недатыкальнасьць, на справядлівы судовы разбор і на свабоду асацыяцыяў.
Пры разглядзе справы Бяляцкага беларускія суды, як сьцьвярджаецца ў дакумэнце, адхілілі доказы таго, што сродкі на фінансаваньне дзейнасьці «Вясны» прызначаліся і выкарыстоўваліся менавіта на названыя мэты, а не як асабістыя сродкі Бяляцкага, і не разглядалі справу з пункту гледжаньня гарантыяў права на свабоду асацыяцыяў. У працэсе разгляду крымінальнай справы парушалася і прэзумпцыя невінаватасьці, што выявілася ў інфармацыі дзяржаўных СМІ і выказваньнях Лукашэнкі пра віну Бяляцкага яшчэ да вынясеньня прысуду.
Камітэт па правах чалавека патрабаваў пераглядзець хадайніцтва аб рэгістрацыі «Вясны» ў адпаведнасьці зь Міжнародным пактам аб грамадзянскіх і палітычных правах, ануляваць судзімасьць Бяляцкага і сплаціць яму належную кампэнсацыю, у тым ліку пакрыць судовыя выдаткі, а таксама прадухіліць падобныя парушэньні ў будучыні, прывёўшы нацыянальнае заканадаўства ў адпаведнасьць зь Міжнародным пактам па правах чалавека.
У лісьце нагадваецца, што згодна з Палажэньнем аб Міністэрстве замежных спраў Рэспублікі Беларусь адна з задачаў дадзенага міністэрства — кантроль за выкананьнем міжнародных дамоваў дзяржаўнымі органамі Рэспублікі Беларусь і аказаньне судзеяньня ў іх выкананьні.