Акцыя памяці Ігара Пцічкіна пад сьценамі турмы

«Зьбіраемся ў 12.30 на Нямізе каля царквы, ідзем у бок Валадарскага 2, пры сабе мець гвазьдзікі, маленькую сьвечку, кветкі кладзем ля сьцен СІЗА-1 памінальная хвіліна, пасьля запальваем сьвечкі і ідзем у бок Чырвонага касьцёла, і там канчатковая кропка».

Як паведамляе карэспандэнт Радыё Свабода, ужо ад 11:30 каля будынка турмы дзяжурыў аўтазак.

Андрэй Бандарэнка з праваабарончага аб'яднаньня «Плятформы» паведаміў Радыё Свабода, што цяпер дапамагае сваякам у высьвятленьні прычынаў сьмерці Ігара Пцічкіна, яго арганізацыя спраўджвае атрыманыя з розных крыніцаў факты, каб пасьля праверкі агучыць іх.

Даведка Радыё Свабода: Ігар Пцічкін

Менчуку Ігару Пцічкіну быў 21 год. Пцічкіна пакаралі 3 месяцамі арышту за тое, што кіраваў аўтамабілем, ня маючы правоў. Для адбыцьця пакараньня Ігара Пцічкіна зьмясьцілі ў менскі сьледчы ізалятар на вуліцы Валадарскага 30 ліпеня, а ўжо 4 жніўня вязень памёр.

Сваякі Ігара Пцічкіна не паверылі ў вэрсію пра раптоўную сьмерць у выніку спыненьня сэрца. Яны спасылаліся на плямы на целе нябожчыка.

На сустрэчы з начальнікам СІЗА сваякам Ігара Пцічкіна паведамілі, што 3 жніўня ў яго нібыта пачалося «псыхаматорнае ўзбуджэньне», з-за чаго яго мусілі «зафіксаваць мяккімі рамянямі».

«Плятформа» зьбіраецца агучыць усё, што ведае пра сьмерць Пцічкіна

У гэтай сувязі Андрэй Бандарэнка прыводзіць гісторыю 21-гадовага менчука Ігара Пцічкіна, які сканаў у СІЗА на Валадарцы. Гэтымі днямі былі ягоныя саракавіны. Малады чалавек ні на кога не наяжджаў. Ён цалкам пагадзіўся з рашэньнем суду аб трохмесячным адміністрацыйным арышце (за невыкананьне ранейшага прысуду аб пазбаўленьні права кіраваць транспартным сродкам). Яшчэ раней малады чалавек быў аштрафаваны за ужываньне алькаголю за рулём. У яго быў выбар: ці адбыць пакараньне ў Горацкай калёніі-пасяленьні, ці сплаціць штраф — 80 мільёнаў.

Арганізатары заклікаюць вКонтакте прыходзіць на Нямігу, дзе пачнецца акцыя.

Карэспандэнт Свабода паведамляе, што каля будынка турмы шмат міліцыі, дзяжурыць аўтазак. Удзельнікі акцыі яшчэ не падышлі

Удзельнікі ідуць у бок Валадаркі

Сваякі сабраліся на Нямізе і рушылі ў бок турмы на Валадарскага. Сястра Ігара Пцічкіна дае журналістам інтэрвію. Побач стаяць 3 чалавекі ў цывільным і выклікаюць некага па рацыі.

​

На рагу Гарадзкога валу і Нямігі да ўдзельнікаў акцыі пад’ехаў сіні мікрааўтобус з нумар 9427 IK7. Затрымалі ўдзельнікаў акцыі, а таксама карэспандэнта Свабоды Алега Грузьдзіловіча і журналістаў «Нашай Нівы» Ірыну Арахоўскую і Ганну Бадзяку

Журналістаў, якія стаялі побач, адвялі ў бок і сказалі апусьціць камэры. Акцыя закончылася

Стала вядома, што сярод затрыманых — Андрэй Бандарэнка, лідэр праваабарончага аб’яднаньня «Плятформа». Яго арганізацыя дапамагае сям'і праясьніць акалічнасьці сьмерці Пцічкіна.

Затрыманыя знаходзяцца ў Цэнтральным РУУС

Карэспандэнт Свабоды дазваніўся да Ірыны Пцічкінай. Паводле яе словаў, затрыманыя знаходзяцца ў Цэнтральным РУУС, ідзе праверка дакумэнтаў, але яшчэ не сказалі, у чым іх абвіначваюць.

Усе знаходзяцца ў адным пакоі, аднак міліцыянты забараняюць размаўляць па мабільным тэлефоне. Пцічкіна сказала, што абыходзіліся з затрыманымі карэктна. На пытаньне, ці выпусьцяць яе раней, паколькі яна цяжарная, Пцічкіна сказала, што гаворкі пра вызваленьне пакуль увогуле не ідзе, па адным заводзяць у пакой, але нічога канкрэтнага ня кажуць.

Кіраўнік прэс-службы ГУУС Менгарвыканкаму Аляксандар Ластоўскі на просьбу карэспандэнта Радыё Свабода паспрыяць вызваленьню затрыманых журналістаў «Нашай Нівы» і Радыё Свабода, якія выконвалі свае прафэсійныя абавязкі, адказаў, што ён вельмі заняты іншымі справамі і нічым ня можа дапамагчы.

Журналістаў выпусьцілі з пастарунку, астатніх затрыманых — не.

Праз тры гадзіны затрыманых журналістаў адпусьцілі з пастарунку. Хаця фактычна іх ужо падрыхтавалі да адпраўкі на Акрэсьціна — адабралі тэлефоны, прымусілі зьняць гадзіньнікі, пярсьцёнкі, рамяні.

У пастарунку застаюцца сястра Пцічкіна Ірына Мірановіч і сябры: Ігар Кавалёў, Аляксандар Гаўрыш, Віктар Катлянік і Сяргей Яўменаў.

У хлопцаў адкаталі пальцы, узялі адбіткі абутку, сфатаграфавалі ў фас і профіль. Калі карэспандэнт Свабоды Алег Грудзьдзіловіч зь імі разьвітваўся і сказаў «Пакуль, хлопцы, убачымся», міліцыянты пажартавалі: «Праз пару тыдняў».

Сястра Ігара Пцічкіна Ірына Мірановіч на дзявятым месяцы цяжарнасьці, да таго, ж мае маленькага сына, якому няма яшчэ і двух гадоў.

Аляксандар Ластоўскі ўсё ж такі прыехаў у Цэнтральны РУУС і паспрыяў вызваленьню журналістаў.

Паводле прадстаўніцы «Плятформы» Алены Красоўскай-Касьпяровіч, затрыманы праваабаронца, кіраўнік «Плятформы» Андрэй Бандарэнка. Ён зьбіраўся далучыцца да ўдзельнікаў акцыі па ўшанаваньні памяці Ігара Пцічкіна, загінулага 4 жніўня ў СІЗА на Валадарскага. Апошні раз ён патэлефанаў каля 12-й гадзіны і паведаміў, што ўжо на падыходзе, знаходзіцца ля Чырвонага касьцёлу. Цяпер на тэлефанаваньні Бандарэнка не адказвае. Паводле папярэдняй інфармацыі, ён знаходзіцца ў Маскоўскім РУУС.

Цяжарную Ірыну Мірановіч, сястру Ігара Пцічкіна, а 17:30 выпусьцілі з пастарунку.

Чацьвёра хлопцаў застаюцца ў Цэнтральным РУУС.