Вялікае адмоўнае сальда спадар Сідорскі тлумачыць так:
“Для эканомікі Беларусі, як і для іншых краінаў ЭўрАзЭС, 2007 год быў няпростым. Адыгралі сваю ролю ўсясьветныя нэгатыўныя тэндэнцыі — падаражэньне сыравіны, матэрыялаў, сельскагаспадарчай прадукцыі, абвастрэньне сытуацыі на валютным рынку”.
Незалежны эканаміст Леанід Злотнікаў у інтэрвію нашаму Радыё называе тры прычыны, якія прывялі да рэзкага росту адмоўнага сальда Беларусі:
“Найперш — гэта падвышэньне коштаў газу і нафты, якія мы імпартуем з Расеі.
Другая — беларуская прадукцыя пачала траціць канкурэнтаздольнасьць на замежных рынках, асабліва на расейскім. Гэта выразна відаць, напрыклад, на продажы лядоўняў, кошт якіх стаў меншым параўнальна з іншымі гадамі, бо па старых коштах іх купляць ня хочуць. Скараціўся аб’ём (калі глядзець на грошы) экспарту нашых тэлевізараў, іншых спажывецкіх тавараў.
Трэцяя прычына — валютны курс. Летась курс даляра ў нас фактычна не зьмяніўся, а рубель страціў сваю вагу на 10—12%. І гэта таксама адбілася на імпарце і экспарце”.
Леанід Злотнікаў ня бачыць, за кошт чаго можна зьменшыць адмоўны гандлёвы балянс сёлета. На яго думку, калі ўлады нават працягнуць штучна стрымліваць імпарт у Беларусь, гэта можа выправіць становішча працэнтаў на 5, але ня больш. Эканаміст тлумачыць свой прагноз тым, што асноўная частка сыравіны і матэрыялаў, якія завозяцца ў Беларусь, — гэта так званы прамежкавы імпарт. “Ён патрэбны, каб нашыя прадпрыемствы не прастойвалі, а працавалі” — тлумачыць Леанід Злотнікаў.
