Удзел у малітве ўзялі прадстаўнікі розных хрысьціянскіх канфэсіяў, а таксама прадстаўнік Ватыкану ў Беларусі Марцін Відавіч.
Цягам тыдня экумэнічная малітва адбывалася ў грамадах розных хрысьціянскіх канфэсіяў. Супольнае набажэнства прывітальным словам распачаў мітрапаліт Тадэвуш Кандрусевіч:
“Я дзякую ўсім тым, хто прыняў нашае запрашэньне. Гэта знак таго, што вы клапоціцеся пра еднасьць хрысьціянаў. Гэта знак таго, што вы хочаце, каб усе мы былі адно”.
![](http://gdb.rferl.org/E1D62173-D36F-4025-82AC-E32858EA505B_w250_s.jpg )
Падчас супольнай малітвы слова бралі старшыня Біблійнага таварыства Герман Родаў, прадстаўнік праваслаўнай царквы айцец Аляксандар Шымбалёў, лютэранскай – Уладзімер Меерсон, грэка-каталіцкай – Сяргей Гаек. Апошні з названых, у прыватнасьці, адзначыў:
“Тое, што мы тут, у сэрцы Менску, можам сабрацца разам – гэта ўжо вялікі дар ласкі Божай. Бог усё гэта бачыць, і няхай гэтыя супольныя высілкі ён блаславіць”.
![](http://gdb.rferl.org/643AF02B-F72B-4300-931D-C99E195BCD5C_w250_s.jpg )
Хор менскай архікатэдры ў гэты вечар выконваў каталіцкія і праваслаўныя хваласьпевы на беларускай, расейскай і лацінскай мовах. Многія вернікі казалі, што яны ўпершыню бралі ўдзел у такой малітве:
Спадарыня: “Такая імша – гэта вялікая карысьць для ўсіх нас, гэта знак, што мы, хрысьціяне, разам. Верым, што будзе мір і сяброўства, калі мы будзем зьбірацца вось так разам”.
Карэспандэнтка: “Ці ўдзельнічалі вы ў такой імшы раней?”
Спадарыня: “Не, нічога такога не было. І мы вельмі радыя”.
На экумэнічнай малітве прысутнічалі таксама некаторыя палітыкі, у тым ліку Павал Севярынец.
Карэспандэнтка: “Вы як адзін з адраджэнцаў Беларускай хрысьціянскай дэмакратыі сёньня тут невыпадкова...”
Севярынец: “Так, натуральна. У 1917 годзе менавіта тут, у касьцёле імя найсьвяцейшай Панны Марыі, была заснаваная Беларуская хрысьціянская дэмакратычная злучнасьць, зь якой і пачалася гісторыя хрысьціянскай дэмакратыі ў Беларусі. А сёньняшняя малітва аб еднасьці хрысьціян – гэта тое, што мы даўно хацелі пачуць ад беларускіх цэркваў. Гэта заклік да яднаньня беларускай нацыі – ні больш, ні менш”.