У міліцыю актывістку выклікаюць як сьведку для дачы тлумачэньняў у крымінальнай справе.
Позву за подпісам начальніка аддзелу аховы правапарадку й прафіляктыкі маёра Падарэнкі актывістка атрымала сёньня.
Тацяна Буланава зьвязвае выклік у міліцыю зь плянаваным на 21 студзеня пратэстам прадпрымальнікаў у Магілёве й Менску.
Таксама сёньня міліцыянт асабіста прынёс позву ў міліцыю на 21 студзеня незалежнаму магілёўскаму журналісту Алесю Буракову. Буракова ўдома не было, і міліцыянт хацеў уручыць яе маці журналіста. Тая паведаміла, што сын у Польшчы, і міліцыянт позвы не пакінуў.
10 студзеня Алесь Буракоў у складзе дэлегацыі прадпрымальнікаў удзельнічаў у перамовах з начальнікам управы прадпрымальніцтва Магілёўскага аблвыканкаму Віктарам Красоўскім. У кабінэце Красоўскага ўсіх прадпрымальнікаў, у тым ліку й журналіста, змусілі зарэгістравацца.
Алесь Буракоў у тэлефоннай размове ня выключыў, што іншых перамоўнікаў таксама выклічуць у міліцыю на 21 студзеня.
