“Як толькі будуць уведзены істотныя для нашай эканомікі санкцыі, то мы адрэагуем вельмі жорстка па ўсіх накірунках, у палітыцы, у эканоміцы і іншых сфэрах. Першы, хто будзе вышпурнуты, гэта будзе пасол Злучаных Штатаў”.
Аляксандар Лукашэнка, кіраўнік Беларусі – у выступе напярэдадні Новага году
“Гэта – апошняя кропка, апошняе папярэджаньне Злучаным Штатам… калі ЗША захочуць давесьці справу да гэтага, дык яны тое і атрымаюць”.
Мікалай Чаргінец, старшыня міжнароднай камісіі Савету Рэспублікі – пра пагрозу А. Лукашэнкі выслаць з краіны пасла ЗША
“Амэрыканцы будуць працягваць вайну з рознымі тэрарыстамі, а эўрапейцы даваць грошы сваім суседзям, каб неяк іх цывілізаваць”.
Віктар Івашкевіч, намесьнік старшыні партыі БНФ – з прагнозу на 2008 год
“Мяркую, у наступным годзе ўлады саступяць, і “Народная воля” будзе нарэшце распаўсюджвацца праз кіёскі “Саюздруку”. Таксама думаю, што ўлада зьменіцца, Беларусьсю будзе кіраваць новы чалавек, і ягонае прозьвішча будзе не Лукашэнка”.
Марына Коктыш, журналістка газэты “Народная воля” – з прагнозаў на 2008 год
“Як кажуць мудрыя людзі, не бывае так кепска, каб ня стала яшчэ горш. Год Пацука ўсё ж такі. Хто зможа “крысятнічаць”, той, на жаль, і будзе “крысятнічаць”.
Алесь Яўсеенка, гомельскі праваабаронца - з прагнозаў на 2008 год
“Выбары ў Расеі ўжо адбыліся, хаця мы ня ведаем, хто будзе кіраваць Расеяй”.
Віталь Сіліцкі, палітоляг – з прагнозаў на 2008 год
“Лукашэнка хоча езьдзіць па горадзе не на аўтамабілі, як усе, а на танку, і пры гэтым не зьвяртаць увагі, якое сьвятло гарыць – чырвонае ці зялёнае”.
Анатоль Лябедзька, старшыня Аб’яднанай Грамадзянскай партыі
“На палітыку ўжо няма ані спадзяваньняў, ані страхаў”.
Ігар Бабкоў, культуроляг і пісьменьнік – у перадачы “Праскі акцэнт” “2008: прагнозы, страхі, спадзяваньні”
“Я ня зьвязваю гэта з новым маладым пакаленьнем, якраз новае пакаленьне больш за ўсё расчароўвае… Гэта канфармісты, прагматыкі, рацыяналісты, людзі, якія паводле сваіх жаданьняў вельмі хутка сталі старымі”.
Сьвятлана Алексіевіч, пісьменьніца – у перадачы “Праскі акцэнт” “2008: прагнозы, страхі, спадзяваньні” пра пэспэктывы пераменаў
“Калі ў студзені людзі даведваліся пра крызыс з экранаў тэлевізараў, і ў іх нараджаліся трывожныя думкі, то напрыканцы году пра крызыс яны даведаліся праз цэньнікі. Рэакцыя была ўжо вельмі канкрэтнай. Урэшце людзі перанесьлі адказнасьць на ўладу. Гэта і ёсьць вынік 2007 году. Улады ў тых жа навагодніх віншаваньнях раз за разам кажуць пра нейкія зьнешнія пагрозы. Аднак на пытаньне, хто ж вінаваты, людзі цяпер адказваюць — улада. І гэта адбіваецца на дынаміцы як рэйтынгу даверу, так і электаральнага рэйтынгу”.
Сяргей Нікалюк, палітоляг – пра дадзеныя апытаньня літоўскага дасьледнага цэнтру НІСЭПД аб падзеньні рэйтынгу А.Лукашэнкі
