Лінкі ўнівэрсальнага доступу

2007: Дасягненьні і страта “Свабоды”


Цягам 2007 году беларуская служба Радыё Свабода надалей актыўна разьвівалася: мы удасканальвалі эфір, выдавалі кнігі і мультымэдыйныя дыскі з нашымі перадачамі а ў самым канцы году быў запушчаны новы сайт беларускай Свабоды. Не абышлося сёлета і без цяжкіх стратаў.


Я спытаўся ў майго калегі, да нядаўняга часу - дырэктара Беларускай службы Радыё Свабода Аляксандра Лукашука, які быў 2007 год для беларускай “Свабоды”:



Аляксандар Лукашук ад кастрычніка выконвае абавязкі галоўнага рэдактара Радыё Свабода / Радыё Свабодная Эўропа. Заняцьце нашым калегам гэтай высокай пасады мы бясспрэчна таксама можам лічыць адным з дасягненьняў Беларускай службы за гэты год.

*****

Паводле статыстыкі, найбольшую цікавасьць слухачоў і наведнікаў сайту прыцягнула асьвятленьне жывых падзеяў – перадусім масавых акцыяў апазыцыі – Дня Волі, Дзядоў, восеньскіх маршаў. Гэтыя падзеі шырока асьвятляліся ў радыёэфіры і на сайце. Сёлета мы далей разьвівалі комплекснае асьвятленьне ўсімі магчымымі сродкамі – онлайн-рэпартажы, фотагалерэі, відэафрагмэнты, аўдыёрэпартажы на сайце па-за эфірным часам, аўдыёслайды. Апошняе было сёлетняй навінкай і ўяўляе сабой спалучэньне радыёрэпартажу і слайд-шоў.



Так зь месца падзеяў перадавала Ганна Соўсь і яе голас наведнікі сайту svaboda.org маглі пачуць адразу, амаль што ў рэальным часе, задоўга да нашай вечаровай радыёпраграмы.

*****

Дарэчы, Беларуская служба была першай на Радыё Свабода, хто выкарыстоўваў шырокі мультымэдыйны падыход да асьвятленьня жывых падзеяў, і сёлета мы атрымалі прыз Радыё Свабода за Выдатнае дасягненьне ў мультымэдыйнай канвэргенцыі ў намінацыі “Найлепшы камандны праект канвэргенцыі”. Калі перакласьці гэта на нармальную мову – за наватарскі сынтэз усіх наяўных радыё- і інтэрнэт сродкаў.



Гэтак нам сёлета ўручалі прыз Радыё Свабода за мультымэдыйнасьць.

*****

Наступнае наша дасягненьне зноў сьведчыць пра тое, што Радыё Свабода – ужо ня толькі радыё, гэта больш чым радыё. Гаворка пра нашу кніжную сэрыю “Бібілятэка Свабоды ХХІ стагодзьдзе”. Сёлета ў сэрыі выйшлі тры кнігі – “Імёны Свабоды” Уладзімера Арлова, “Сямейны альбом” Вінцэся Мудрова і зборнік “Плошча”, прысьвечаны менскім падзеям вясны 2006 году.



Гэта былі галасы з прэзэнтацыі кнігі “Плошча” ў Менску. Нагадаю, у сэрыі “Бібілятэка Свабоды ХХІ стагодзьдзе” ўжо выйшла 12 кніг, іх можна згрузіць у фармаце ПДФ з нашага сайту svaboda.org

*****

І яшчэ адзін выдавецкі праект, гэтым разам мультымэдыйны, а ня кніжны, хоць гаворка йдзе пра літаратуру. Творы 50 аўтараў “Начной чытанкі” – літаратурнай рубрыкі праграмы “Начная Свабода” – у аўтарскім чытаньні выйшлі на адмысловым кампакт-дыску разам зь біяграфіямі і фатаздымкамі творцаў. Так свой верш у нашай “Начной чытанцы” чытаў Рыгор Барадулін:



*******

Аляксандар Лукашук назваў 2007 год годам слухача. І сапраўды, мы паспрабавалі максымальна выкарыстаць фактар зваротнай сувязі.

Да традыцыйных відаў сувязі – лістоў і званкоў на Свабоду, апошнім часам дадаліся і ўсё шырэй выкарыстоўваюцца лісты электроннай пошта, СМС-паведамленьні, а апошнім часам – камэнтары да нашых матэрыялаў на сайце. У канцы году ўзровень зваротнай сувязі дасягнуў, можна сказаць, апагею – цяпер кожны тыдзень з намі супрацоўнічае грамадзкі рэдактар, якога мы абіраем сярод нашых случахоў. Грамадзкі рэдактар абірае тэмы для асьвятленьня, сочыць за нашымі матэрыяламі і камэнтуе іх на працягу тыдня, а ў пятніцу цэлая паўгадзіна нашага эфіру фармуецца цалкам на прапановах грамадзкага рэдактара.



Гэта была Ірына Казуліна, жонка палітвязьня Аляксандра Казуліна, актывістка руху змаганьня супраць раку грудзей і наш першы грамадзкі рэдактар.

*****

На працягу ўсяго году актыўна разьвіваўся наш сайт – svaboda.org. Пра некаторыя навінкі я ўжо казаў. Адзначу асобна наш летні фатаконкурс “Мая Беларусь”, на які было даслана больш за тысячу фатаздымкаў, лепшыя зь якіх рэгулярна зьяўляліся на сайце і адмыслова аглядаліся фатографам Валерам Дранчуком.

І вось пад канец году – 10 сьнежня – адбылася важная падзея. 9 гадоў таму, 10 сьнежня 1998 году, у Міжнародны дзень правоў чалавека пачаў працаваць сайт Беларускай службы Радыё Свабода - адзін зь першых сярод службаў нашага радыё. Чарговую гадавіну мы адзначылі сёлета пераходам на новы дызайн. За 9-гадовую гісторыю гэта ўжо чацьвёртая вэрсія сайту svaboda.org.

Сярод навінак:

- Новы дызайн, навігацыя і прынцыпы функцыянаваньня
- Магчымасьць камэнтаваць і абмяркоўваць матэрыялы
- Новыя тэмы i рубрыкі
- Асобны разьдзел грамадзкай журналістыкі
- Расклад радыёперадачаў
- Блогі супрацоўнікаў РС і гасьцей
- Больш фота, больш відэа, больш інтэрактыўнасьці

*****

На вялікі жаль радасьць з усіх нашых дасягненьняў, пра якія я сёньня расказваў, ня можа з намі разьдзяліць наш наймаладзейшы калега Ўладзя Каткоўскі, які мінулымі гадамі сам нямала прычыніўся да нашых посьпехаў. Сёлета ў траўні праспаўшы адзінаццаць месяцаў у глыбокай коме пасьля аўтамабільнай аварыі, ён прачнуўся, але ня ў нашым, а ў нейкім іншым сьвеце.



Уладзя Каткоўскі навучыў нас адной надзвычайна важнай рэчы – паўнацэнна жыць і шукаць шчасьця кожны дзень, кожную хвіліну, кожны момант нашага жыцьця, не адкладаючы на пасьля. Чаго мы і жадаем усім слухачам “Свабоды” ў новым, 2008-м годзе.


Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG