Лінкі ўнівэрсальнага доступу

Польскі прэм''ер сустрэўся з Анжалікай Борыс


Аляксей Дзікавіцкі, Варшава Прэм’ер-міністар Польшчы Казімеж Марцінкевіч прыняў сёньня ў Варшаве непрызнаваную афіцыйным Менскам старшыню СПБ Анжаліку Борыс. Пасьля сустрэчы кіраўнік польскага ўраду, сярод іншага, заявіў, што ў Польшчы працягнецца праца над “картай паляка” у тым ліку і для грамадзянаў Беларусі.

Новы польскі прэм’ер справай даводзіць, што заявы аб дапамозе палякам, што жывуць у Беларусі не былі толькі перадвыбарчымі лёзунгамі – цягам тыдня ён двойчы сустрэўся з прадстаўнікамі непрызнаванага афіцыйным Менскам кіраўніцтва СПБ, прычым сёньня асабіста з Анжалікай Борыс.

Пасьля сустрэчы з кіраўніком польскага ўраду, якая была закрытай для мэдыяў, спадарыня Борыс cказала:

(Борыс: ) “Прэм’ер-міністар заявіў, што Польшча будзе дапамагаць нам, што ўрад вернецца да разгляду пытаньня аб “карце паляка”. Будзе створаная пасада адмысловага ўпаўнаважанага ўраду ў справах дапамогі палякам на ўсходзе, асабліва ў Беларусі”.

Працы над “картай паляка”, на ўзор “карты вугорца”, што Вугоршчына дае румынскім вугорцам, пачалася яшчэ ў Сэнаце мінулага скліканьня. “Карта паляка” павінна была быць нечым накшталт “нацыянальнай візы”, якая сьведчыць аб тым, што продкі яе ўладальніка ці ён сам некалі мелі польскае грамадзянства і належаць да польскага народу.

Прапаноўвалася таксама даць шэраг льготаў на ўезд і, прыкладам, вучобу ўладальнікам “карты паляка” ў Польшчы.

Між тым сам Казімеж Марцінкевіч заявіў, што ў часе сустрэчы з кіраўнікамі найбуйнейшых краінаў Эўразьвязу ўжо закранаў пытаньні сытуацыі ў Беларусі. Паводле ягоных словаў, усе справы, зьвязаныя зь Беларусьсю, павінны вырашацца менавіта на ўзроўні кіраўніцтва Эўзразьвязу, а Брусэль мусіць яшчэ больш актыўна цікавіцца беларускай сытуацыяй.

Польскі прэм’ер, аднак, не адказаў наўпрост на пытаньне журналістаў, ці будзе Варшава дамагацца ўвядзеньня эмбарга на імпарт беларускіх тавараў у краіны Эўразьвязу.

***

Учора Анжаліка Борыс заявіла журналістам, што ў хуткім часе, магчыма, ня будзе мець магчымасьці выехаць у Польшчу.

(Борыс: ) “Адзін з памежнікаў, беларускіх памежнікаў, калі я перасякала мяжу, заявіў літаральна наступнае: “Вы ж ведаеце, што вы едзеце ў Польшчу ўжо апошні раз”.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG