Лінкі ўнівэрсальнага доступу

Афіцыйным прафсаюзам офісы будуць бясплатнымі


Міхал Стэльмак, Менск Аляксандр Лукашэнка падпісаў указ, які разьмяжоўвае правы афіцыйных і дэмакратычных прафсаюзаў на арэнду офісаў. Прадстаўнікі незалежнага прафсаюзнага руху лічаць гэта чарговым актам дыскрымінацыі.

Прэзідэнцкі ўказ тычыцца Фэдэрацыі прафсаюзаў, для структураў якой зьмяняюцца ўмовы арэнды памяшканьняў. У той жа час дакумэнт абыходзіць увагай альтэрнатыўнае прафсаюзнае аб’яднаньне, якім зьяўляецца Беларускі кангрэс дэмакратычных прафсаюзаў. Вось што паведаміў пра гэта старшыня БКДП Аляксандр Ярашук:

(Ярашук: ) “То бок Фэдэрацыя прафсаюзаў мае ўсе правы на тое, каб атрымліваць бясплатна ў арэнду памяшканьні для сваёй дзейнасьці, для правядзеньня, як там напісана, сваіх сходаў, канфэрэнцый і іншых мерапрыемстваў, якія прадугледжаны яе статутам і калі гэта мае адпаведны запіс у заключаных прафсаюзамі, якія ўваходзяць у Фэдэрацыю, пагадненьнях, у тым ліку калектыўных дамовах. Гэта відавочны факт парушэньняў Канстытуцыі і закону аб прафэсійных саюзах, гэта відавочны факт “фаварытызму” з боку вышэйшых дзяржаўных уладаў да аднаго, асобна ўзятага прафцэнтра”.

У цэлым сытуацыя з офісамі ў незалежных прафсаюзаў складаная. Многія структуры незалежных прафсаюзаў, паводле ініцыятываў ўладаў і адміністрацыяў прадпрыемстваў, пазбаўленыя памяшканьняў. У прыватнасьці, гэта тычыцца арганізацыяў Свабоднага прафсаюзу. Вось што паведаміў яго лідэр Генадзь Быкаў.

(Быкаў: ) “Што тычыцца Свабоднага прафсаюзу, то мы 10 гадоў разьмяшчаліся каля плошчы Перамогі ў Менску, але затым нас выкінулі з памяшканьня. Мяне верасень і кастрычнік не пускалі на завод, на якім я працую. Пайшлі лісты пракуратуры. Напрыклад, з Наваполацку, там у нас рэгіянальная арганізацыя. І некалькі арганізацый былі пастаўлены на ўлік і былі зарэгістраваны па хатніх адрасах. Я папрасіў старшыню гарвыканкама даць нам памяшканьне мэтраў на дваццаць. За грошы, вядома. Ніякага адказу. А зараз я атрымліваю ліст ад пракурора. Ён ужо патрабуе. Вось такія справы. І так паўсюдна”.

Праблема офісу востра паўстала днямі перад першаснай арганізацыяй гэтага прафсаюзу, якая дзейнічае на прадпрыемстве “Полацк-Шкловалакно”. 31 кастрычніка ў яе скончылася дамова на арэнду офіса і, нягледзячы на зварот гэтай арганізацыі, у якую ўваходзіць каля 60 рабочых, падоўжыць дамову на арэнду, адміністрацыя дала адмоўны адказ. Пра апошнія падзеі, зьвязаныя з канфліктам вакол офісу, распавядае лідэр прафсаюзнай суполкі Свабоднага прафсаюзу “Полацк-Шкловалакно” Віктар Стукаў:

(Стукаў: ) “Учора мы правялі паседжаньне рады арганізацыі і вырашылі накіраваць два лісты. Адзін у канцэрн “Белнафтахім” і другі генэральнаму дырэктару прадпрыемства. Мы хочам прапанаваць генэральнаму дырэктару тры канкрэтныя памяшканьні, якія б маглі арэндаваць, бо яны незанятыя. А паколькі канцэрн пацьвярджае арэнду памяшканьня, то хочам наўпрост напісаць туды ліст, старшыні канцэрну Сіваму, з просьбай прадставіць нам памяшканьне. У тым будынку, дзе ў нас было памяшканьне памерам 18 квадратных мэтраў, там ёсць і маленькае памяшканьне памерам 4 квадратныя мэтры. Яно вольнае і для выкарыстаньня яго як юрыдычнага адрасу нам дастаткова. Хаця для офісу яно малое. Вольных памяшканьняў на заводзе дастаткова, але вось можа толькі не для нас”.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG