Лінкі ўнівэрсальнага доступу

У Менску створаны новы полк міліцыі спэцыяльнага прызначэньня


Алег Грузьдзіловіч, Менск У Менску распачаў службу полк міліцыі спэцыяльнага прызначэньня, у які ўвайшлі часткі былога сталічнага АМОНу сталіцы. Хто ім камандуе, чым будзе займацца новае фармаваньне і якія заробкі будуць у службоўцаў гэтага палка?

Паводле кіраўніка прэсавай службы менскай міліцыі Алега Сьлепчанкі, полк міліцыі спэцыяльнага прызначэньня ўжо распачаў службу. Ён падпарадкаваны асабіста начальніку менскай міліцыі генэралу Анатолю Куляшову, а камандзірам палка прызначаны Юры Падабед, які раней камандаваў менскім АМОНам. Нагадаю, гэты міліцыянт вызначыўся асабістым удзелам у разгоне шмат якіх акцыяў апазыцыі, у тым ліку летась асабіста зьбіваў лідэра Аб’яднанай грамадзянскай партыі Анатоля Лябедзьку. У ліку некаторых іншых беларускіх кіраўнікоў Юрыю Падабеду забаронены ўезд у краіны Эўразьвязу.

Чым новы полк будзе адрозьнівацца ад частак АМОНу? Алег Сьлепчанка кажа, што фактычна нічым, акрамя колькасьці службоўцаў:

(Сьлепчанка: ) “Той самы АМОН, толькі крыху зьмянілі назву і павялічылі колькасьць”.

Алег Сьлепчанка, аднак, не ўдакладніў, якім ёсьць гэтае павелічэньне і ўвогуле колькі міліцыянтаў будзе служыць у новым палку. Кіраўнік прэсавай службы сказаў, што “звычайна мы такіх рэчаў не паведамляем”. А вось мэтаў новага фармаваньня ў гарадзкой міліцыі не хаваюць — забясьпечваць грамадзкі парадак падчас масавых вулічных мерапрыемстваў, у тым ліку і акцыяў пратэсту апазыцыі. Кіраўнік менскай міліцыі генэрал Анатоль Куляшоў ужо заявіў, што гэтай справай мусяць займацца добра і адмыслова падрыхтаваныя супрацоўнікі.

Як зьяўленьне новага палка міліцыі адаб’ецца на актыўнасьці беларускіх апазыцыянэраў? Актывіст моладзевага руху “Зубр” Алесь Атрошчанкаў мяркуе, што гэта ня спыніць тых, хто не задаволены беларускім рэжымам:

(Атрошчанкаў: ) “Амаль на кожнай акцыі амонаўцаў больш, чым удзельнікаў, але калі апазыцыя ня згубіць мужнасьці, дадатковыя фармаваньні нічога ня зробяць, і ўсё скончыцца добра”.

Алесь Атрошчанкаў нагадаў, што цяпер у шпіталі з траўмай галавы знаходзіцца актывіст “Зубру” Мікіта Сасім, якога амонаўцы зьбілі 16 верасьня.

Колькі плацяць менскім амонаўцам за іх працу і якімі будуць заробкі ў новым фармаваньні? У прэсавай службе менскай міліцыі лічбаў не называюць, спасылаючыся на службовую таямніцу. Апазыцыйны палітык, у мінулым міліцыянт Андрэй Клімаў кажа, што ён ведае пра заробкі менскіх амонаўцаў:

(Клімаў: ) “Шарагоўцы атрымліваюць ад 500 да тысячы даляраў, афіцэры — да 5 тысяч. Таму яны такія адвязаныя. Ён хутчэй недаплаціць старым, пэнсіянэрам, а амонаўцам заплаціць, бо ён нікому не давярае”.

Андрэй Клімаў лічыць, што стварэньне новага палка міліцыі спэцыяльнага прызначэньня тлумачыцца падрыхтоўкай Аляксандра Лукашэнкі да прэзыдэнцкіх выбараў 2006 году.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG