Свабодны прафсаюз Беларускі высяляюць праз суд

Пра рашэньне аб неабходнасьці вызваленьня займанага памяшканьня стала вядома толькі праз дзень пасьля судовага паседжаньня – кажа лідэр прафсаюзу Генадзь Быкаў.

(Быкаў: ) “Сёньня мне патэлефанавалі са ЖРЭА й паведамілі, што 9 жніўня адбыўся суд па нашым высяленьні. Я кажу – як гэта так, што мы нават ня ведалі. Ну, мы фармальна ўсё выканалі, пазовы суд адпраўляў на юрыдычны адрас. А ў нас па ўсіх дакумэнтах праходзіць, што юрыдычны адрас Свабоды, 23, а ліставаньні на адрас Захарава, 24, адкуль нас і высяляюць. У ЖРЭА ўсё ведаюць і ім было лепей, як і судзьдзі, мне здаецца, каб нашых прадстаўнікоў не было”.

Выказаныя спадаром Быкавым меркаваньні пацьвердзіла сакратарка менскага гаспадарчага суду Алена Гладкова.

(Гладкова: ) “Мы накіроўвалі паперы па адрасу юрыдычнай рэгістрацыі. Але ўсе яны вярнуліся й таму справа разглядалася без удзелу адказчыка. Шукаць мы яго не абавязаныя, а таму вельмі шмат справаў менавіта так і завяршаюцца”.

Гаварыла сакратарка менскага гаспадарчага суду Алена Гладкова. Аб прычынах высяленьня незалежнага прафсаюзу, які месьціўся ў арэндаваным памяшканьні 11 гадоў, у адміністрацыі ЖРЭА Партызанскага раёну Менску дакладных тлумачэньняў ня далі. Гаворыць юрыст аб''яднаньня Уладзіслаў.

(Уладзіслаў: ) “Мне паступіў загад падрыхтаваць пазоў паводле адсутнасьці пераважнага права на заключэньне дамовы. Як, чаму – гэта да дырэктара”.

Гаварыў юрыст ЖРЭА Партызанскага раёну Менску. Дырэктар гэтага аб''яднаньня Андрэй Сідарэнка даць нейкія камэнтары адмовіўся. А вось як гэтую сытуацыю пракамэнтаваў лідэр незалежнага прафсаюзу радыёэлектроннай прамысловасьці Генадзь Фядыніч.

(Фядыніч: ) “Тое, што суд адбыўся без прадстаўнікоў Свабоднага прафсаюзу гаворыць на тое, што, відаць, паступіў загад з вышэйшых структураў зрабіць гэта хутчэй і без усялякай валакіты. Гэта крок, які робіцца да 2006 году. Пэўна, ідзе так званая “зачыстка” таксама й тых арэндаваных памяшканьняў, якія сёньня ёсьць камунальнай уласнасьцю”.

Гаварыў Генадзь Фядыніч. Старшыня Свабоднага прафсаюзу Беларускага Генадзь Быкаў, заявіў, што лічыць патрабаваньні чыноўнікаў і рашэньне суду несправядлівымі й намерваецца зьвяртацца ў вышэйшыя судовыя інстанцыі.

Нагадаем, што раней прымусовае высяленьне з арэндаваных сядзібаў перажылі Партыя камуністаў Беларуская, гарадзенская суполка Беларускага народнага фронту, суполкі Таварыства беларускай мовы ў рэгіёнах і іншыя арганізацыі. Таксама з-за адсутнасьці памяшканьня й іншых прычынаў толькі апошнім часам у Беларусі былі зачыненыя каля 50 грамадзкіх арганізацыяў.