Лінкі ўнівэрсальнага доступу

С.Скрабца перавялі з карантыну ў “Валадарку”, далі спаткацца са сваякамі


Уладзімер Глод, Менск Жонка і сын вядомага апазыцыйнага палітыка — кіраўніка дэпутацкай групы “Рэспубліка” ў Палаце прадстаўнікоў папярэдняга скліканьня Сяргея Скрабца наведалі так званую “Валадарку” — сьледчы ізалятар часовага ўтрыманьня ў Менску, куды экс-парлямэнтара перавезьлі зь Берасьця. Ім дазволілі перадаць вязьню ежу і кнігі. А вось прыняць сьвежыя газэты адмовіліся.

Сын апазыцыйнага палітыка Мікалай ня бачыў бацьку больш за паўгоду. Аляксандра Скрабец гаворыць, што ён нават разгубіўся, паколькі бацька ніколі не выглядаў такім схуднелым:

(Аляксандра Скрабец: ) “Сын яго бачыў, калі муж важыў 95 кіляграмаў. А цяпер — 70. Мабыць, нават і менш. Муж казаў, што ў Берасьці ўзважыўся, і было 70 кіляграмаў. Але ж пакуль яго амаль пяць сутак везьлі ў Менск, ён амаль нічога ня еў. Казаў, што так лягчэй было пераносіць сьпякоту ў цягніку. Ды і давалі там такую страшную ежу, што муж баяўся, каб не атруціцца”.

Я пацікавіўся ў Аляксандры Скрабец, якія прысмакі яна падрыхтавала для мужа:

(Скрабец: ) “Рыбу смажаную, садавіну, гародніну. Таксама разынкі, курагу, чарнасліў, арэхі, семкі...”

Паводле спадарыні, муж адчувае сябе нядрэнна:

(Скрабец: ) “Гаворыць: галава не баліць, сон нармальны, чытаю, ем... Газэты ёсьць, у ізалятары іх выпісваюць. Але перадаць газэты нельга. Дазваляюць толькі выпісваць”.

Сяргей Скрабец папрасіў родных прынесьці яму кнігі Фёдара Дастаеўскага “Браты Карамазавы” і Льва Талстога “Вайна і мір”.

Што тычыцца малодшага брата Сяргея Скрабца Аляксандра, які праходзіць як суўдзельнік па справе старэйшага брата, дык ён 5 жніўня чарговы раз адказваў на пытаньні сьледзтва.

Сяргей Скрабец быў затрыманы 15 траўня каля свайго дому ў Менску. У той жа дзень яго адвезьлі ў Берасьцейскі сьледчы ізалятар. Там на знак пратэсту ён абвясьціў галадоўку, якая цягнулася амаль 40 дзён. Пасьля таго, як рэспубліканская пракуратура аб’яднала дзьве справы былога дэпутата — выманьваньне крэдытаў у дзяржавы і падбухторваньне да дачы хабару — у адну справу, сьледчы ў асабліва важных справах Вячаслаў Цераховіч вырашыў перавесьці арыштанта ў Менск.

Летам 2004 году Сяргей Скрабец удзельнічаў у галадоўцы дэпутатаў, якія патрабавалі дэмакратызацыі выбарчага заканадаўства. Летась у кастрычніку ён зьвярнуўся да прэзыдэнта Расеі з просьбай аб палітычным прытулку, аднак атрымаў адмоўны адказ. Сёлета ў красавіку Беларускае тэлебачаньне сьцьвярджала, што спэцслужбы затрымалі кур’ера, які вёз зь Вільні 200 тысяч даляраў, нібыта для фінансаваньня палітычнай дзейнасьці Сяргея Скрабца.
Ігар Лосік Кацярына Андрэева Ірына Слаўнікава Марына Золатава Ягор Марціновіч

Самае папулярнае

XS
SM
MD
LG