Лінкі ўнівэрсальнага доступу

“Літва павінна выказаць салідарнасьць палякам”


Тацяна Поклад, Вільня Пасьля пагаршэньня польска-беларускіх дачыненьняў літоўскія палітыкі, якія выступалі за зьмены у стаўленьні Эўразьвязу да Беларусі, пераглядаюць свае меркаваньні. Кіраўнік парлямэнцкага камітэту замежных справаў Літвы Юсьцінас Каросас мяркуе, што цяперашняе абыходжаньне беларускіх уладаў з польскай нацыянальнай меншасьцю ускладняе вырашэньне праблемы ізаляцыі Беларусі.

Міністэрства замежных справаў Літвы пакуль не выказвае афіцыйнай рэакцыі на пагаршэньне польска-беларускіх дачыненьняў. Рамунас Мачус, кіраўнік прэсавай службы міністэрства замежных справаў Літвы:

(Мачус: ) “Міністэрства замежных справаў назірае за сытуацыяй, аналізуе яе, кансультуецца з суседнімі краінамі і прадстаўнікамі Эўразьвязу.”

Парлямэнцкі камітэт замежных справаў яшчэ таксама не абмяркоўваў афіцыйна гэтую праблему. Кіраўнік камітэту замежных справаў у Сойме Літвы, Юсцінас Каросас аднак выказаў сваю пазыцыю для Радыё Свабода:

(Каросас: ) “Я выкажу толькі сваю пазыцыю. Я цяпер ўвесь час кажу пра тое, што палітыка ізаляцыі нашых суседзяў беларусаў не дае вынікаў і варта было б гэтую палітыку у Эўразьвязе перагледзець, скажам, такім чынам, каб асобныя краіны маглі б больш мець магчымасьцяў для дачыненьняў зь Беларусьсю. Але такія крокі, такае абыходжаньне з польскай нацыянальнай меншасьцю з боку беларускіх уладаў цяпер трохі ускладняюць гэтую сытуацыю. Парушэньні правоў чалавека – найбольш датклівае месца і тыя дзяржавы, тыя палітыкі, якія гэдак дзейнічаюць, вартыя ізаляцыі. Таму, я мяркую, што Літва павінна выказаць салідарнасьць палякам, бо калі такім чынам парушаюцца правы чалавека, не даецца магчымасьці для самавыяўленьня нацыянальным меншасьцям, трэба больш сурова на гэта глядзець.”

Адносна канкрэтных магчымых дзеяньняў з боку Літвы кіраўнік парлямэнцкага камітэту замежных справаў сказаў:

(Каросас: ) “Мы можам салідарызавацца палітычна, іншыя якія дзеяньні не асабліва патрэбныя.”

У буйнейшай грамадзкай польскай арганізацыі у краіне, Саюзе палякаў Літвы, пакуль адмовіліся камэнтаваць сытуацыю. Пакуль абмяркоўваюцца і абдумваюцца публічныя заявы і іншыя афіцыйныя дзеяньні, адна з супрацоўніц польскамоўнай газэты Літвы “Кур''ер Віленскі” падзялілася сваімі меркаваньнямі:

(Спадарыня: ) “Паводзіны Лукашэнкі мяне трохі шакуюць, у многіх сытуацыях ён паводзіцца вельмі па-дактытарску. Насамрэч гэта вельмі актуальна для палякаў у Беларусі – мець болей свабоды, каб яны мелі магчымасьць паўсюль, – як звычайна у дэмакратычных краінах, – ужываць родную мову – то бок, у школе, дома, у грамадзкіх арганізацыях, у мас-мэдыях, і гэтак далей, – а з гэтага робіцца вялізарная палітычная справа, і я лічу, гэта зусім не патрэбна. Як полька, я таксама выступаю у абарону палякоў у Беларусі. “Кур''ер віленскі” падаваў інтэрвію з Анжэлікай Борыс, зь іншымі, спрабавалі размаўляць і з Тадэвушам Кручкоўскім, я разумею, што справа там не зусім чыстая і старая улада павінна адыйсьці. Калі ня будзе абраная Анжаліка Борыс, то можа быць нехта іншы, але старая улада ніяк не надаецца для кіраваньня Саюзам палякаў Беларусі.”

Вам можа яшчэ спадабацца

XS
SM
MD
LG