Лінкі ўнівэрсальнага доступу

Выстава памяці Васіля Быкава адкрылася ў Палацы мастацтваў


Валянціна Аксак, Менск “Залучаны на вечнасьць” — так называецца выстава, якая сёньня ўвечары адкрываецца ў сталічным Палацы мастацтваў. Яна прысьвечаная памяці народнага пісьменьніка Беларусі Васіля Быкава, якому празь месяц споўніўся б 81 год.

Экспазыцыя выставы “Залучаны на вечнасьць” займае адну з трох заляў Палацу мастацтваў. Яна складзеная з твораў, напісаных беларускімі мастакамі ў розныя гады. Гаворыць ініцыятар выставы кіраўнік творчае суполкі “Пагоня” Мікола Купава:

(Купава: ) “Тэма Васіля Быкава ў нашым мастацтве ўжо дастаткова распрацаваная, я думаю, што ад 1960-х гадоў. У 1970—80-я росквіт быў, паколькі шмат выдавалі Быкава, таму і мастакі шмат працавалі. Будзем гаварыць, што тут дзьве асноўныя плыні: інтэрпрэтацыя літаратурных яго твораў, ілюстрацыі (наагул мастацтва кнігі даволі высока ў нас узьнялося дзякуючы і ілюстрацыям паводле твораў Быкава) і ягоныя вобразы”.

У экспазыцыі шырока прадстаўленая кніжная графіка паводле твораў Васіля Быкава. Гэта найперш аркушы народнага мастака Беларусі Арлена Кашкурэвіча і Юрася Жызьнеўскага-Герасіменкі, якія ў свой час афармлялі аповесьці “Яго батальён” і “Знак бяды”.

На выставе шмат партрэтаў Васіля Быкава. Народнага пісьменьніка малявалі Леанід Шчамялёў, Май Данцыг, Міхаіл Савіцкі, Міхаіл Моўчан. Тут жа краявіды, напісаныя Міколам Купавам і Ўладзімерам Сулкоўскім на радзіме Быкава ў вёсцы Бычкі.

Калі гэтая выстава плянавалася, то меркавалася, што ў яе экспазыцыю ўвойдуць і творы, напісаныя падчас леташняга мастацкага пленэру на Вушаччыне, прысьвечанага 80-годзьдзю Быкава і наладжанага таксама суполкаю “Пагоня”. Аднак менская пленэрная выстава адчынілася ў Чырвоным касьцёле толькі пяць дзён таму і на гэтую рэтраспэктыўную творы зь яе не патрапілі.

Дзьве адначасовыя мастацкія экспазыцыі ў сталіцы краіны, прысьвечаныя памяці народнага пісьменьніка, толькі падкрэсьліваюць значнасьць асобы Васіля Быкава, гаворыць Мікола Купава.

(Купава: ) “Мы такім чынам сьцьвярджаем, што Васіль Быкаў, як тое дрэва, расьце і цягнецца да Бога, у вышыню, і ён ніколі нікуды не зьнікаў. Наадварот, зь ім нам належыць і нашая цяпершчына, і нашая будучыня”.

Падчас адкрыцьця выставы прагучала ідэя сабраць сродкі і выкупіць партрэт Быкава, напісаны мастаком Моўчанам, з тым, каб павесіць яго ў кватэры народнага пісьменьніка. Куды наагул вернуцца з выставы творы, прысьвечаныя Быкаву? Мікола Купава так адказаў на гэтае пытаньне:

(Купава: ) “Раней распараджалася гэтым міністэрства — яно купляла альбо не купляла, а цяпер няхай хоць трошкі народ наш пацікавіцца гэтым, куды яно пойдзе”.

Міністэрства культуры ніякае цікавасьці да выставы, прысьвечанай памяці Васіля Быкава, ня выявіла.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG