Лінкі ўнівэрсальнага доступу

Сацыял-дэмакраты cпадзяюцца, што ім удасца правесьці аб’яднаўчы зьезд з дапамогай Сацінтэрну


Уладзімер Глод, Менск Пра гэта 13 траўня на адмысловай прэсавай канфэрэнцыі паведаміў першы намесьнік старшыні Беларускай сацыял-дэмакратычнай партыі “Народная грамада” Ўладзімер Нісьцюк.

Уладзімер Нісьцюк нагадаў пра тры няўдалыя спробы — 19 сакавіка, 10 красавіка ды 9 траўня — правесьці аб’яднаўчы зьезд дзьвюх сацыял-дэмакратычных партыяў:

(Нісьцюк: ) “Вось ужо тры спробы адбыліся. І ўсе тры разы ўсе тыя структуры, арганізацыі, зь якімі існавалі дамовы, якія атрымалі авансы за арэнду памяшканьняў ды іншыя паслугі, усё гэта ў апошні момант перакрывалася пад уплывам спэцслужбаў. Учора мы правялі пашыраную нараду і вырашылі накіраваць лісты Генэральнаму сакратару Сацінтэрну і кіраўнікам шэрагу братэрскіх партыяў, каб паспрабаваць атрымаць з таго боку эфэктыўную падтрымку, атрымаць адтуль сыгналы салідарнасьці. Мы папрасілі Генэральнага сакратара Сацінтэрну, каб ён накіраваў асабісты ліст Аляксандру Лукашэнку з патрабаваньнем растлумачыць, што ўсё ж адбываецца на беларускім палітычным полі”.

Я спытаў спадара Нісьцюка, ці магчыма правядзеньне аб’яднаўчага зьезду за межамі Беларусі. Як высьветлілася, такая магчымасьць вывучалася:

(Нісьцюк: ) “Ёсьць шэраг партыяў, якія цяпер пры ўладзе ў краінах Эўропы — у Нямеччыне, Літве, Гішпаніі, Вялікабрытаніі ды іншых краінах. Але нам Міністэрства юстыцыі Беларусі дало тлумачэньне: адпаведна з Законам аб палітычных партыях і адпаведна са статутам, палітычныя партыі дзейнічаюць на тэрыторыі Рэспублікі Беларусь і будуюцца згодна з тэрытарыяльным прынцыпам. Таму за межамі краіны праводзіць зьезду нельга”.

Падчас прэсавай канфэрэнцыі было паведамлена, што ўсе дакумэнты, неабходныя для прызнаньня першай сэсіі аб’яднаўчага зьезду легітымнай, перададзеныя ў Міністэрства юстыцыі, якое цяпер праводзіць праверку.

Тым часам лідэр новай партыі Аляксандар Казулін, як было паведамлена на прэсавай канфэрэнцыі, “праводзіць шэраг замежных сустрэчаў”.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG