Лінкі ўнівэрсальнага доступу

У Менску адбыўся вайсковы парад


Алег Грузьдзіловіч, Менск Адкрываючы вайсковы парад у Менску, Аляксандар Лукашэнка папярэдзіў Захад, што Беларусь “надае самую вялікую ўвагу абароназдольнасьці краіны”.

Тым часам у Маскве адбыўся парад у гонар Перамогі, на якім прысутнічалі кіраўнікі вядучых краінаў сьвету і СНД. З кіраўнікоў былых рэспублік Савецкага Саюзу на парадзе не было лідэраў Эстоніі, Літвы, Грузіі і Беларусі.

Больш за дзьве гадзіны пад дажджом без парасона прастаяў Аляксандар Лукашэнка на парадзе, прысьвечаным 60-годзьдзю Перамогі. Калі дождж узмацніўся, было заўважна, як па пінжаку кіраўніка краіны сьцякала вада, але парасон над ім так і не зьявіўся.

Адкрываючы парад, Аляксандар Лукашэнка гаварыў аб праблемах, якія непакояць яго больш за дрэннае надвор’е. У тым ліку кіраўнік Беларусі сказаў пра канфлікты ў сьвеце, якія “спараджаюць прэтэндэнты на ўсясьветнае лідэрства”.

(Лукашэнка: ) “Таму мы надаем такую пільную увагу абароназдольнасьці краіны. Нашае войска ёсьць надзейным гарантам цэласнасьці і бясьпекі Беларусі”.

Усьлед за войскамі і вайсковай тэхнікай у парадзе ўзялі ўдзел баявыя верталёты і самалёты. Яны нізка ляцелі ўздоўж вуліцы, якая яшчэ ўчора называлася Ерусалімскай. Большасьць самалётаў — старыя савецкія, але мадэрнізаваныя на заводах Беларусі. Праз гукаўзмацняльнікі камэнтатар паведаміў, што на гэтых самалётах беларускія асы робяць тое, чаго ня ўмеюць расейскія і нават амэрыканскія лётчыкі.

Пасьля вайсковага параду і дэманстрацыі дасягненьняў гаспадаркі пачалося тэатралізаванае шэсьце. Сярод яго ўдзельнікаў былі дзеці, апранутыя ў лёгкія летнія строі. У гэты час у Менску ішоў праліўны даждж, а слупок тэрмомэтра паказваў плюс дзесяць градусаў.

Тым часам у Маскве скончыўся парад, на якім прысутнічалі кіраўнікі вядучых краінаў сьвету і краінаў СНД. Пасьля параду лідэры ўсклалі кветкі да магілы Невядомага салдата. У першым шэрагу стаялі амэрыканскі і расейскі прэзыдэнты Джордж Буш і Ўладзімер Пуцін з жонкамі, далей кіраўнікі Францыі, Нямеччыны, Гішпаніі, Японіі, лідэры краінаў СНД. З кіраўнікоў былых савецкіх рэспублік на парадзе не было толькі грузінскага прэзыдэнта Саакашвілі, прэзыдэнтаў Літвы — Адамкуса, Эстоніі — Руйтэля і Беларусі — Лукашэнкі. Адсутнасьць беларускага лідэра ў тэлерэпартажы з Масквы ніяк не камэнтавалі.

8 траўня Аляксандар Лукашэнка пабываў з кароткім візытам у сталіцы Расеі Маскве. Ён сустрэўся з кіраўнікамі краінаў СНД і ўзнагародзіў вэтэранаў мэдалямі за вызваленьне Беларусі. Падчас гэтай цырымоніі Аляксандар Лукашэнка заявіў, што ў Беларусі ня будзе ніякіх “рэвалюцыяў і бандыцкіх мерапрыемстваў”. “Як бы хто ні баражыраваў вакол нашых сумесных межаў, у іх нічога не атрымаецца”, — заявіў Аляксандар Лукашэнка у Маскве 8 траўня. У той жа дзень ён вярнуўся ў Менск, пасьля чаго дзяржаўныя мэдыі паведамілі, што ягоны візыт завяршыўся. Між тым, да 8 траўня афіцыйна казалі, што А.Лукашэнка пасьля параду ў Менску зноў адляціць у Маскву. У першай палове 9 траўня гэтых зьвестак афіцыйна ніхто не пацьвердзіў.

9 траўня лідэры апазыцыйных арганізацыяў усклалі кветкі да помніка Перамогі ў Менску і да помніка ахвярам Менскага гета. У гэтых цырымоніях бралі ўдзел Вінцук Вячорка, Аляксандар Дабравольскі, Валер Фралоў, Уладзімер Колас, Аляксандар Бухвостаў, Сяргей Калякін ды іншыя вядомыя апазыцыйныя актывісты.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG