Лінкі ўнівэрсальнага доступу

Ці маглі наўмысна зьбіць самалёт зь беларускім экіпажам у адносна мірнай Танзаніі?


Ігар Карней, Менск Целы шасьцёх беларускіх лётчыкаў, якія загінулі ў авіякатастрофе ў Танзаніі, будуць дастаўленыя на апазнаньне ў Менск да канца гэтага тыдня. Сёньня ў сталіцу гэтай афрыканскай дзяржавы адляцеў самалёт малдаўскай кампаніі “Airline Transport Inc.”, якая наняла беларускіх пілётаў дзеля працы ў Афрыцы. Зь якімі праблемамі сутыкаюцца авіятары, якія пагаджаюцца на падобныя кантракты?

Цягам некалькіх дзён у афрыканскае возера Вікторыя рухнулі два самалёты. 19 сакавіка над ім пацярпеў аварыю “Boeing 707” (тады прычынай было названа дрэннае надвор’е). Увечары 23 сакавіка, адразу ж пасьля ўзьлёту, у ваду рухнуў грузавы Іл-76, экіпаж якога складалі шасьцёра беларусаў — Канстанцін Знак, Юры Несьцярэнка, Аляксандар Мікалаеў, Яўген Пабаруеў, Андрэй Маркевіч і Аляксандар Лях. Што сталася прычынай катастрофы — пасьля расшыфроўкі “чорнай скрыні” скажуць экспэрты. Пакуль асноўнай вэрсіяй называецца чарада птушак, якія быццам патрапілі ў рухавікі самалёту.

Аднак досьвед працы ў Афрыцы прымушае авіятараў рабіць і іншыя высновы. Практычна кожны, хто адтуль вярнуўся, расказвае пра рэйсы, не акрэсьленыя кантрактнымі абавязкамі. У мінулым прадстаўнік місіі ААН у Заіры Антон Ігнатаў пацьвярджае, што ў асобных краінах Афрыкі большую палову авіяперавозак складае стралковая зброя. Аднак, паводле Ігнатава, Танзанія ў гэты шэраг не трапляе, бо там падзел тэрыторыяў скончыўся значна раней. Таму наўрад ці самалёт зь беларускім экіпажам мог быць зьбіты зь зямлі.

(Ігнатаў: ) “Ангола, Конга — ранейшы Заір… Там, дзе няма цывілізацыі, дзе канец геаграфіі, альбо яна вельмі слаба разьвіваецца — так лепей сказаць, то там рызыка найвышэйшая. Я быў у Конга-Заіры, і мне гэтага хапіла — давялося адтуль уцякаць”.

Цягам некалькіх дзён пасьля авіякатастрофы экспэрты не маглі высьветліць дзяржаўнай прыналежнасьці паветранага борта. Малдова, пад сьцягам якой працаваў Іл-76, афіцыйна заявіла, што ў краіне няма ніводнага самалёта такой клясы, гэтаксама як і лётчыкаў, падрыхтаваных для працы на такой тэхніцы. Аднак аказалася, што ў Малдове найпрасьцей у СНД зарэгістраваць самалёты, чым актыўна карыстаюцца суседнія краіны (перадусім Украіна і Расея), а пілётамі на “малдаўскія” судны запрашаюць беларусаў. Мой суразмоўца Антон Ігнатаў кажа, што беларускія лётчыкі ахвотна згаджаюцца на такія прапановы, паколькі сталай працы ў Беларусі на ўсіх не хапае.

(Ігнатаў: ) “Вы маеце рацыю: езьдзяць у бальшыні сваёй з прычыны грошай. Там вырашаюць усё грошы. А якія там могуць быць канфлікты? Зьбілі іх альбо не — гэта тэма ўжо іншага парадку”.

(Карэспандэнт: ) “З-за грошай не зважаюць нават на магчымыя захворваньні — тую ж малярыю?”

(Ігнатаў: ) “Так, калі хтосьці захварэў і няма, ня дай Бог, грошай, і калі няма іх у каго пазычыць — то чалавек можа памерці”.

Самалёт малдаўскай авіякампаніі, які пацярпеў катастрофу ў Танзаніі, быў застрахаваны ў Расеі. Прадстаўнікі страхавой кампаніі сьцьвярджаюць, што кожны зь лётчыкаў быў застрахаваны ад няшчаснага выпадку на 20 тысяч даляраў. Між тым, небясьпека працы ў афрыканскіх краінах застаецца ранейшай, кажа Антон Ігнатаў.

(Ігнатаў: ) “Мы і ў Зымбабвэ, і ў Танзанію ляталі. А Конга — гэта ўвогуле канец сьвету. Калі ня браць гатэль і некалькі будынкаў у цэнтры гораду, то ўвогуле страшна кудысьці выйсьці. Дый мясцовыя да прыежджых дрэнна ставяцца: ня дай бог даведаюцца, што амэрыканец, дык і пабіць могуць, а што пальцам бясконца будуць тыкаць — адназначна”.

У кампаніі “Трансавіяэкспарт” дзе пэўны час працавалі ўсе загінулыя, спадзяюцца, што целы іх калегаў будуць дастаўленыя дадому цягам двух ці трох дзён.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG