Прадпрымальнікі спрабавалі прабіцца да рэзыдэнцыі прэзыдэнта

Цягам трох гадзінаў больш за тры тысячы прадпрымальнікаў мітынгавалі на Кастрычніцкай плошчы. Міліцэйскае кіраўніцтва знаходзілася ўвесь час побач з мітынгоўшчыкамі, але не патрабавала разысьціся, нягледзячы на тое, што акцыя была несанкцыянаваная.

Амонаўцы сядзелі ў аўтобусах у дварах будынкаў, што побач з плошчай.

Пасьля выступу ўсіх ахвотных прадпрымальнікі вырашылі пайсьці да будынку адміністрацыі Аляксандра Лукашэнкі, каб перадаць яму свае патрабаваньні. Вялікай калёнай прадпрымальнікі пайшлі з Кастрычніцкай плошчы ў бок вуліцы Янкі Купалы. Перайшлі там дарогу і рушылі да будынку адміністрацыі. Але на лесьвіцы, якая вядзе да Дому афіцэраў, дарогу ім перагарадзілі амонаўцы.

Амонаўцы разам зь іншымі міліцыянтамі пачалі выціскаць натоўп зь лесьвіцы і са сквэру. Некалькі жанчын не ўтрымаліся на нагах і паваліліся на сьнег. Пасьля гэтага настрой у дэманстрантаў зьмяніўся. Дэманстранты прынялі рашэньне вярнуцца на плошчу і там стаяць, пакуль улады не прапануюць правесьці перамовы. Прадпрымальнікі папрасілі міліцыянтаў перадаць асабіста Аляксандру Лукашэнку, што яны прызвычаіліся гандляваць у цяжкіх умовах і стаяць на марозе могуць доўгі час.

Гл. таксама • Пратэсты ў Менску: Віцэ-прэм’ер заявіў прадпрымальнікам, што падатак адменены ня будзе