Лінкі ўнівэрсальнага доступу

Прадстаўнікі апазыцыі станоўча ацэньваюць вынікі браціслаўскага саміту


Валер Каліноўскі, Менск Апазыцыйныя палітыкі ў Беларусі пазытыўна ацэньваюць вынікі браціслаўскага саміту кіраўнікоў ЗША і Расеі. Рэакцыі Аляксандра Лукашэнкі і ўраду Беларусі на ўчорашнія заявы Джорджа Буша аб дэмакратызацыі Беларусі і вынікі браціслаўскага саміту кіраўнікоў ЗША і Расеі пакуль няма.

(Савіных: ) “Мы ня лічым неабходным камэнтаваць гэтыя словы, гэтая тэма ўжо атрымала дастаткова шырокае асьвятленьне ў СМІ, і няма сэнсу яе яшчэ дапаўняць”, — сказаў прэсавы сакратар МЗС Беларусі пра ўчорашнія заявы прэзыдэнта ЗША Джорджа Буша наконт Беларусі.

Тым часам, беларускія палітыкі і грамадзкія дзеячы працягваюць камэнтаваць браціслаўскі саміт. Дырэктар НІСЭПД Алег Манаеў у складзе беларускай групы грамадзкіх лідэраў працягвае знаходзіцца ў Браціславе. Сёньня ў беларусаў былі рабочыя сустрэчы зь дзеячамі са Славаччыны і іншых краінаў з мэтай рэалізацыі тых ідэяў, што там абмяркоўваліся ў папярэднія дні — на міжнароднай канфэрэнцыі і падчас кантактаў з ўладамі Славаччына, ЗША, у тым ліку і з прэзыдэнтам Джорджам Бушам.

Спадар Манаеў перакананы, што Ўладзімер Пуцін успрыняў заклік Джорджа Буша адносна дэмакратыі ў постсавецкай прасторы, у тым ліку і ў Беларусі.

(Манаеў: ) “Я ведаю напэўна, што падчас перамоваў Буша і Пуціна былі дзьве галоўныя тэмы на парадку дня: першая — праблемы бясьпекі, барацьба з тэрарызмам, а другая — якраз дэмакратыя. І ў рамках абмеркаваньня другога пытаньня, наколькі мне вядома, пытаньне пра Беларусь і іншыя краіны СНД уздымалася. Першая рэакцыя Пуціна на гэта была напружанай. Але Пуцін — чалавек разумны і высновы з падзеяў ва Ўкраіне ён робіць. Цяпер Пуцін у даволі складаным становішчы, і я мяркую, што ён успрыме частку таго, аб чым яму казаў амэрыканскі прэзыдэнт”.

Паводле Алега Манаева, падчас размовы, якая праходзіла ў Буша з Пуціным, выкарыстоўвалася тая інфармацыя, якую амэрыканскі лідэр атрымаў ад гутаркі з грамадзкімі актывістамі з краінаў нашага рэгіёну, у тым ліку і прадстаўнікамі Беларусі.

(Манаеў: ) “Мне падаецца, што гэта было нешта новае для яго. Таму я думаю, што ў цэлым вынік сустрэчы Буша і Пуціна менавіта па пытаньні дэмакратыі будзе хутчэй станоўчы, чым адмоўны”.

Удзел групы беларускіх дзеячоў у браціслаўскіх падзеях спадар Манаеў назваў плённым.

Былы кандыдат у прэзыдэнты Беларусі Ўладзімер Ганчарык таксама ўпэўнены ў выніковасьці ўплыву Джорджа Буша на Ўладзімера Пуціна ў пляне стаўленьня да дэмакратыі ў Беларусі:

(Ганчарык: ) “Ёсьць некалькі ўмоваў, якія павінны прывесьці да дэмакратыі ў Беларусі: па-першае, гэта сам народ Беларусі, па-другое, патрэбная дапамога, з боку Расеі, Эўропы і Амэрыкі. І вось Амэрыка можа паўплываць і непасрэдна, і праз гэтыя краіны, у першую чаргу, праз Расею”.

Уладзімер Ганчарык перакананы, што заявы міжнародных лідэраў павінны перарасьці ў новую якасьць дзеяньняў адносна палітычнай улады ў Беларусі, і таму апазыцыі трэба актыўна рыхтавацца да будучых прэзыдэнцкіх выбараў. А Станіслаў Шушкевіч лічыць, што пазыцыя Буша сьведчыць, што ён актыўна выконвае абавязкі перад Кангрэсам, унесеныя ў “Акт аб дэмакратыі ў Беларусі”. Праўда, у спадара Шушкевіча ёсьць сумненьні што да магчымасьці ягонага ўплыву на пазыцыю Ўладзімера Пуціна.

(Шушкевіч: ) “Мне спадабалася, што там падчас сустрэчы з Бушам былі дзьве жанчыны зь Беларусі, што была адзначаная пазыцыя, што ўрэшце там была простая заява чалавека, які многа значыць у сьвеце. Думаю, што гэта павінна мець уплыў. Але баюся, што не было ніякай гаворкі на нашую тэму з кіраўніком Расеі, бо Пуцін сказаў, што яны ідуць да дэмакратыі. Калі яны будуць так ісьці, дык мы далёка ня зойдзем. Таму што яны будуць нам ва ўсялякім разе перашкаджаць”.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG